Wir Alber von gotes gnaden hertzog ze Österreich, ze Steyr, ze Kernden vnd ze Krain, Graf ze Tyrol etc., bechennen vnd tun kunt offenlich mit disen brief vmb die vier belehenten gueter vnd vm die hofstat ze Vlrichslag bey Waydhofen vf der Tey, die Neithhart von Vlrichslag von vns ze lehen hat gehabt vnd die er verchoufft hat den erbern vnd geistlichen dem abt vnd dem conuent ze Altenburch, daz wir denselben geistlichen leutten ze Altenburch die aygenschaft der egenanten lehenschaft lautterlich durch got vnd durch vnser vnd aller vnser voruordern vnd nachkomen selen trost vnd hail willen, gegeben haben vnd geben auch also, daz si damit allen iren frvmen geschaffen mvgen mit verchouffen, mit versetzen vnd geben, swem si wellent, alz in daz allerpest kome vnd fuge an all irrung, in aller der weis, alz si mit andern iren aygen guetern tunt. Mit vrkunt ditz brifs, geben ze Wienn, an Mitichen nach sand Philipps vnd sand Jacobs tag der heiligen zwelifbotten, nach Krists gepurd dreutzehenhnndert iar, darnach in dem neun vnd sechtzigistem iare.

Source Fulltext: BURGER, Urkunden Altenburg (=FRA II/21, 1865) S. 255-256