Ich Hans von Schönberch, vnd ich Anna sein hawsvraw vnd alle vnsre erben, wir vergechen offenleich an dem prief vnd tun chunt allen den, di in sechent, lesent, oder horent lesen, di nv lebent oder hernach chunftig werdent, daz wir mit wol wedachtem mut vnd mit gutem willen, vnd gunst aller vnser erben, vnd mit gesampter hant zv der zeit, do wir is wol getun machten, gegeben haben lewtterlich durich got, vnd durich vnser sel willen, den erbern geystlichen herren apt Seyfriden vnd dem conuent gemain dez chlosters ze Altenburch, vnd allen iren nachchommen, di aygenschaft fumf schilling pfenning geltes Wienner mvinzz, daz sew recht vnd redleich guehuft habent von dem erbern chnecht Herman dem Huendler von Asparn, vnd ligent di vorgenanten fumf schilling pfenning geltz datz Hawtzendorf auf ainem halben gestiften lechen, vnd di zeit aufgesezzen ist Niclas der Chinster, vnd Katrey sein hawsvraw, ze nachst den zwain höfen Chainrates dez Mern vnd Mychel dez Frantzen. Di vorgenante aygenschaft haben wir gegeben dem chloster vnd der sampnung gemain ze Altenburch ledichleich vnd vreyleich ze haben mit allen dem recht, als wir sey gehabt haben, allen iren frum domit ze schaffen, versetzen, verchawfen vnd geben wem si welln, an allen irresal. Wir wellen auch, ich vorgenanter Hans von Schönberch, vnd ich Anna sein hawsvraw mitsampt allen vnsern erben vnuerschaidenleich diselb aygenschaft schermen den chloster zu Altenburch, oder swem sew di gebent, für all ansprach nach aygens recht vnd dez landes recht ze Östereich. Vnd daz di red vnd di wandlung der sach also stete vnd vntzeprochen peleib fürbaz ewichleichen, darvber gib ich obgenanter Hans von Schönberch den prief ze einem getzeug diser sach, versigelten mit meinem anhangundem jnsigel, vnd zv einer pessern sicherheit ich gepeten hab mein ochem hern Weycharten von Wynchel, der getzewg ist mit seinem anhangunden jnsigel diser saeh, im an schaden. Der prief ist geben ze Schönberch, nach Christz gupurt drewtzechen hundert jar, vnd darnach in dem fumf vnd simbtzigisten jar, des Mentags vor gotzleichnammes tag.

Source Fulltext: BURGER, Urkunden Altenburg (=FRA II/21, 1865) S. 263-264