Johannes dei gratia episcopus Patauiensis ad perpetuam rei memoriam. Literas sanctissimi in Christo patris et domini nostri domini Vrbani diuina prouidentia pape sexti eius vera bulla plumbea in filis sericeis more Romane curie bu^ellatas non abolitas non cancellatas non abrasas sed sanas et integras omnique prorsus vicio et suspicione carentes nobis pro parte venerabilium et religiosorum virorum abbatis et conuentus monasterii sancti Lamperti in Altenburch, ordinis sancti Benedicti, nostre dioecesis, presentatas ex qua decuit reuerentia recepimus per omnia in hec verba: (Folgt die Urkunde Nr. CCCI, vom 10. Juni 1381). Post quarum quidem literarum apostolicarum presentacionem et receptionem iidem abbas et conuentus nobis debita supplicarunt cum instantia, quatenus dicte incorporationis sub modo et forma in dictis expressatis literis apostolicis consentire et annuere dignaremur. Nos attendentes pontificali congruere officio, monasteria in quibus fratrum religiosorum tumulus deuotis mentibus altissimo famulatur assidue studio pietatis respicere, ipsorumque necessitatibus fauoribus et auxiliis succurrere opportunis, prefate incorporationi et aliis in dictis contentis literis apostolicis ob et ad causas in eisdem expressatas consensum nostrum beneuolum adhibuimus et tenore presentium adhibemus, iuribus tamen publicis nobis et successoribus nostris iure debitis semper saluis. In quorum vim et singulorum euidens testimonium et certitudinem pleniorem presentes literas fieri, ac sigilli nostri appensione fecimus roborari. Datum Wienn supradicte nostre dioecesis die XXIII. mensis Novembris, anno domini millesimo trecentesimo octuagesimo quarto.

Source Fulltext: BURGER, Urkunden Altenburg (=FRA II/21, 1865) S. 274-275