Vniuersis Christi fidelibus presentes litteras inspecturis nos Andreas dei et apostolice sedis gratia episcopus Victricensis et pro tunc suffraganeus curie Patauiensis salutem in domino sempiternam. Cordi nobis est diuinum cultum, quantum nobis ab acto conceditur, nostris temporibus adaugere. In hac enim dominice passionis recolitur memoria Christus ipse et pro uiuorum ac mortuorum salute ymmolatur hostia salutaris. Cum itaque nos anno domini M. quadringentesimo vicesimo tercio, vltima die mensis Septembris monasterium sancti Lamberti jn Altenburch cum suo cimiterio reconciliauimus, dies dedicacionis predicti monasterij Patauiensis diocesis hactenus haberi consueuit dominica proxima Martini, et fidelis populus ad dedicacionem huiusmodi non in tantum confluit, sicud si idem festum alio tempore celebraretur, nobis fuit humiliter per venerandum in Christo patrem ac dominum dominum Connradum abbatem tunc temporis predicti monasterij cum suo toto conuentu supplicatum, quatenus ipsam dedicacionem more benigni patris ex hijs et alijs causis nobis expositis transponere dignaremur. Nos uero attendentes peticionem huiusmodi fore iustam et consonam rationi, anniuersarium dicte dedicacionis eisdem ex causis et ex certa sciencia auctoritate ordinaria qua fungimur in hac parte duximus transponendum atque transponimus per presentes, statuentesque ipsum die dominica, qua in ecclesia dei canitur "misericordia domini" perpetuis temporibus peragendum. Et ut Christi fideles diuinum cultum in eodem monasterio eo feruencius visitent et illuc confluant, nos omnibus vere penitentibus et confessis, qui dictum monasterium in anniuersario eiusdem dedicacionis jn festiuitatibus natiuitatis circumcisionis epyphanie domini et per octauas gloriosissime virginis Marie beatorum apostolorum omnium sanctorum et in commemoracione omnium animarum et presertim in patrocinijs predicti monasterij deuote visitauerint et ad [conservationem] et fabricam ipsius monasterij suas manus porrexerint adiutrices, de omnipotentis dei misericordia et beatorum Petri et Pauli apostolorum eius confisi suffragijs quadraginta dies indulgencie de iniunctis sibi penitencijs misericorditer in domino relaxamus, harum sub appensione nostri sigilli testimonio litterarum. Datum anno die et loco prenotatis.

Source Fulltext: BURGER, Urkunden Altenburg (=FRA II/21, 1865) S. 308-309