Wir Ferdinand von gots genaden printz in Hispanien ertzhertzog zu Osterreich, hertzog zu Burgundt, zu Steir, zu Kernndten, zu Crain, lanntgraue in Elsas, fürst zu Schwaben, gefürster graue zu Tyrol, zu Habspurg, zu Gortz, zu Phierdt, zu Kyburg, marggraue des heiligen Romischen Reichs, der Enns vnnd zu Burgaw, herr auf der Windischen Margkh vnnd zu Portenaw etc. bekhennen für vnns vnd vnnser erben, das für vnns khomen ist der ersam geistlich vnnser lieber andechtiger der abbt zu Alltenburg, vnnd hatte vnns diemuetigclich, das wir jme vnd seinem conuent daselbst all vnnd yedtlich jr vnd jres gotzhauss genad gab, freyhait, brief, priuilegia, allt loblich herkhomen vnd guet gewonnhait, so jn von weilennd vnnsern vorfordern fursten von Osterreich gegeben, vnd jungst von weilend vnnsern lieben herrn vnd anherrn kaiser Maximilian hochloblicher gedechtnuss confiermiert vnd bestätt weren, vnd vnns desshalben die rechten hauptbrief furbracht, als regierennder herr vnnd lanndsfürst in Osterreich, auch genedigclich zu vernewen vnd zu bestatten geruechlen. Haben wir angesehen der gemellten klosterlewt diemuetig bette, auch den gotzdiennst, so sy teglichen in demselben jrem gotzhauss volbringen, des wir auch tailhafftig zu werden verhoffen, vnrid jnen dardurch die gemelten jr genad, gab, freyhait, brief, priuilegia, allt loblich herkhomen vnd guet gewonnhait, so vil sy der in gebrauch sein vnnd dartzue in jren freyhaiten, darumben sy in rechtferttigung vnnd ansprach steen mochten vnuergriffen vnd an schaden, genedigclich vernewn, confirmiert vnd bestätt, vernewen, confirmiren vnd bestetten jnen die auch wissenntlich mit dem brief, was wir jnen zu recht daran vernewen vnnd bestatten sollen vnnd mugen, also, das die in allen jren puncten vnnd artigkhln darinnen begriffen, als ob die von wort zu woerten hierinn geschriebenn stuennden genntzlich beycrefften beleiben, vnnd sich die genannten closterlewt der geniessen vnd gebrauchen mugen, vnd von nimanntz darwider gedrungen noch beschwert werden solen on geuerd. Vnd gebieten darumben den edlen vnnsern lieben getreuen allen vnd yeden vnsern haubtlewten, landmarschalhen, grauen, freyen herrn, rittern vnnd knechten, verwesern, vitzdomben, pflegern, burggrauen, lanndtrichtern, burgermaistern, richtern, ratten, burgern, gemainden vnd allen anndern vnnsern ambtlewten, vnnderthanen vnnd getreuen ernnstlich, vnnd wellen, das sy die genannten closterlewt bey den gemelten jr vnnd jres gotzhauss genaden, gaben, freyhaiten, briefen, priuilegien, allten loblichen herkhomen vnnd gueten gewonnhaiten vnd dieser vnnser vernewung vnd bestattung genntzlich vnd berueblich beleiben lassen, vnnd sy dawider nicht dringen, noch beschweren, noch des yemantz anndern ze thun gestatten in khain weiss, als lieb ainem yeden sey vnnser schwere vngnad vnnd straft zu uermeiden; das ist vnnser ernnstliche maynung. Mit vrkhundt ditz briefs, besigelt mit vnnserm anhanngendem jnnsigl. Geben in vnnser stat Newenstat, am sechtzehenndtem tag des monat Decembris, nach Cristi geburde funnfftzehenhundert vnnd im zwayundzwainntzigisten jare. .. .Fer.... — Comissio serenissimi domini principis archiducis in consilio. — ...Lamberg, ... Jorger ritter, L von Harroch, S. von Herberstain.

Source Fulltext: BURGER, Urkunden Altenburg (=FRA II/21, 1865) S. 373-374