In nomine sancte et individue trinitatis; amen. Henricus dei gratia abbas Chotwicensis omnibus hanc literam suscepturis salutem in perpetuum. Discretorum virorum providentia ea, que inter ipsos aguntur in tempore, ne per oblivionem humanam a memoria simul labantur cum tempore, scriptis providit ac proborum virorum testimonio confirmare, quorum nos vestigia observantes omnibus innotescimus hanc litteram inspecturis, quod venerabilis prepositus et conventus de Osterhouen predecessorum nostrorum temporibus utriusque ecclesie considerata utilitate curiam suam apud Chrems cum omnibus attinentiis, vinetis et agris a decimis nobis inde provenire^a taliter exemerunt, quod villam, que superior Vuchou¹ dicitur, nostre ecclesie contulerunt in recompensationem predictarum decimarum perpetuo possidendam ita tamen, ut dimidia carrada vini nobis de prelibata curia annis singulis persolvatur nosque ipsis in equipollentia curiam villicariam addidimus apud Teizz liberaliter possidendam. Ne autem super hiis pretextu alicuius vendicionis seu obligationis nostrarum decimarum predicte curie de Osterhouen super libertate sue exempcionis calumnia seu questio ammodo oriatur, sed hic tractatus a nostris predecessoribus solempniter factus perpetuo robur obtineat firmitatis, ipsum tenore et auctoritate presentium renovamus ac perenniter confirmamus sigilli nostri atque conventus caracterem apponentes testibus etiam, qui huic publicationi et renovationi intererant, subnotatis, qui sunt: Irnfridus decanus Chremensis, Hertnidus sacerdos, Albero Winceler, Chunradus sacerdos de Prufing, Pertoldus Trawernius, Meinhardus de Lapide, Chunradus Seuelder Ratisbonensis senior, Haystolfus Grossus, Otto filius Haystolfi, Hevnlo, Meinhardus de Camera, Waltherus Moderstoch et alii quam plures. Actum in Stayn anno domini MCCLI, indictione X.²

Source Fulltext: FUCHS, Göttweig I (=FRA II/51, Wien 1901) S. 134-135