Innocentius episcopus, servus servorum dei, dilectis filiis abbati et conventui monasterii sancte Marie Chottuicensis ordinis sancti Benedicti Pataviensis docesis salutem et apostolicam benedictionem. Licet is, de cuius munere venit, ut sibi a fidelibus suis digne ac laudabiliter^a serviatur de habundantia^b pietatis sue, que merita supplicum excedit et vota bene servientibus multo maiora retribuat, quam valeant promereri, cupientes tamen reddere domino populum acceptabilem, fideles Christi ad conplacendum ei quasi quibusdam illectivis premiis, indulgentiis scilicet et remissionibus invitamus, ut exinde reddantur divine gratie aptiores. Ut igitur ecclesia monasterii vestri congruis honoribus frequentetur, omnibus vere penitentibus et confessis, qui ecclesiam ipsam in die dedicationis eiusdem venerabiliter visitaverint, de omnipotentis dei misericordia et beatorum Petri et Pauli apostolorum eius auctoritate confici quadraginta dies de iniunctis sibi penitentiis annis singulis misericorditer relaxamus. Datum Perusii V. kalendas maii, pontificatus nostri anno nono.

Source Fulltext: FUCHS, Göttweig I (=FRA II/51, Wien 1901) S. 135-136