Ich Margeret von Streytwisen tu^en kund allen den, die disen brief horent lesen, daz ich mit verdachtem mu^et und mit gu^etem willen meiner kind Gerdrauten, Heinreichs han verlihen Ortweinn von Gozinkch, im und seiner hawsfrawen Perchten und allen seinen kinden syben ho^effstet , aine zu Velcz und sechse zu Gosinkch mit allem dinst und darczu gehort und zu verkaufen und zu hingeben und mit dem recht, und ich sy gehabt han, umb acht phunt phenning, die er mir darumb gegeben hat also, daz sy sein rechts gekauffts lehen sind sein und seiner kinder und sullen sein, uncz er es mit guetem willen well wider hingeben ze losen, wem er well, umb acht phunt phenning. Und dacz dicz ding und diseu gestat stêt beleib und ungekrencht, so han ich in disen brief gegeben versigilt mit meinem insigil und mit den geczeugen, die hie benant sind, daz ist: her Chunrad von Werde, her Heinreich von Winndarff, her Chunrad der Windischteier, her Albrecht der So^em, her Chunrad der Schreiber von Hêdersdarff, her Col von Kopfstall, her Hanne der Richter von Hêdersdarff, her Wildung von Hêderstarff, her Ulreich der Hertrich von Hêderstarff, her Ulreich Smid von Hêderstarff, her Chunrad der ambtman von Goznikch, her Chunrat der von Claubendarff, her Herman Wocherlinn, her Wolfel von Goka^eus, des Missower ambtman, her Ru^edolff der Ffrechs^a von Goznikch, her Heinreich ez Enikel von Goznikch, her Gerlach von Groznik, her Rudgêr von Goznikch, her Ru^edolff der Hilpranttin su^en, her Fridreich der Porckel von Hohenwart, her Albrecht Gulgant von Hohenwart, her Albrecht des Plenicker ambtman von Hohenwart und ander frum leu^et. Dicz ding ist geschehen und diser brief ist gegeben, da von Kristi gepurd sind gewesen tausent iar zwai hundert iar und new^en und achczig an unser frawen tag zu der liechtmess.

Source Fulltext: FUCHS, Göttweig I (=FRA II/51, Wien 1901) S. 194-195