Ich Wernhart von Hippleinstorf¹ und mein housfrow, fro Sewurch, veriehen und tůn chunt allen den, di nu sint und hernach chu^enftich werdent, daz wir dem erbaern abbte und der samnung ze Cho^etweig unsers rechten aigens an zehen siben Shilling gu^elt ouf dem lehen daze Zaizzenperig,² darauf dazselb gotshaus emaln het zehen und drei Shilling gu^elt, haben verchouffet umb driuzehen pfunt pfenning und sein desselben gutes shon gewert und haben ouch in di vorgenanten gu^elt gegeben vreileich und an all vogtai und mit gůtem willen meins pruder Hermans von Hippleinstorf mit so^etam gelu^ebd, daz wir desselben gůtes sullen ir sherm und ir gewer sein fu^er all ansprach, als des landes recht ist. Daz aber di sache staet und unzebrochen ebichleich beleib, haben wir dem vorgenantem gotshaus gegeben disen brief verinsigelten mit hern Livtolts insigel von Chvnring und mit dem meinn und meins vorgenanten pruder insigel. Der sache sint ziug: her Ott der Floit, Fridreich Plům Vlreich Plům Chvnrat von Hv^ernpach, Cholman und sein pruder Andre von Stein, Engelshalch von Furt, Chunrat und Vlreich doselben und ander piderb laeut. Der brief ist geshriben ze Chotweig, do von Christes geburt waren tousent iar zwai hundert iar an dem vir und niunzkistem iar an sand Tomas abent.

Source Fulltext: FUCHS, Göttweig I (=FRA II/51, Wien 1901) S. 213