Universis^a Christi fidelibus presentia visuris nos archiepiscopus frater Bonaventura Ragusinus, Petrus Stagni et Curzule, frater Maurus Ameliensis, Andreas Lydensis, frater Iacobus Acernensis, frater Azo Casertanus, Aymardus Lucerie, frater Lambertus Veglensis, Paschalis Cassinensis dei gracia episcopi salutem in omnium salvatore. Pia mater ecclesia de filiorum suorum, quos spiritualiter genuit, salute sollicita devocionem ipsorum quasi quibusdam allectivis muneribus, indulgenciis videlicet et peccatorum suorum remissionibus invitare consuevit ad debiti faniulatus honorem deo et sacris edibus praecipue in missarum sollempniis impendendum, ut quanto illuc crebrius et devocius confluit christianus populus invicem pro se orans, tanto celerius delictorum suorum veniam et gaudia consequi mereatur eterna. Cum igitur divine dispositionis arbitrio ad huiusmodi pontificatus simus assumpti officium et hec inter alias sollicitudines karitatis^b opera votis ardentibus affectemus, qualiter vigili et operoso ministerio fideles Christo acceptabiles nos reddamus, cupientes equidem ecclesiam beatorum Iacobi et Iohannis in Ragz Pataviensis dyocesis inter templa domini specialibus spiritualium nostrorum munerum largitate et nostros delectamur thesauros spirituales ecclesie christicolis aperire, quorum demum allecti salutari dulcedine ad eam in mentis iubilo ita nunc deum per speculum in enygmate venerantes, honorantes, adorantes accedant, ut tunc facie ad faciem venientem ipsum super eos iudicem securi valeant contemplari. Ut hanc igitur beneficia petiturus quivis ecclesiam ingrediens letetur se in ea^c impetrasse sue peticions humilem instanciam in eterna sibi beatitudine profuturam, omnibus vere penitentibus et confessis, qui predicte ecclesie limina devote visitaverunt in omnibus et singulis festivitatibus infrascriptis videlicet nativitatis resurrectionis ascensionis et penthecostes domini nostri Iesu Christi necnon in festivitatibus beate et gloriose dei genitricis Marie scilicet nativitatis annunciationis purificationis et assumptionis, sancti Mychahelis archangeli, beatorum Iohannis baptiste et ewangeliste,^b sancte Marie Magdalene, singulorum apostolorum, beatorum martirum Stephani Laurencii, sanctorum confessorum Nycolai Martini Egidiique, beatarum virginum Katherine Agnetis Lucie Barbare Margarete et in die dicte ecclesie dedicationis et patroni, antedictarum festivitatumque omnium per octavas singulisque diebus dominicalibus quadragesime domini et adventus, statutis quatuor temporibus nec non sacris et diebus rogationum aut qui dicte ecclesie quidquam suarum facultatum a deo sibi collatarum dederint aut in extremis laborantes legaverint pro quacumque vice, in quocumque necessitatis articulo manus suas dexteras porrexerint adiutrices, singuli singulis singulas indulgencie quadragenas confisi de omnipotentis dei misericordia et beate sue genitricis semper virginis Marie omniumque sanctorum intercessione beatorumque Petri et Pauli principum apostolorum auctoritate misericorditer in domino relaxamus, dummodo dyocesanus hanc nostram indulgenciam roboratam nostrorum sigillorum munimine sui sigilli karaktere duraturam perpetuo confirmarit. Datum Rome aput Sanctum Petrum anno domini millesimo ducentesimo nonagesimo sexto, pontificatus domni Bonifacii pape octavi anno secundo.

Source Fulltext: FUCHS, Göttweig I (=FRA II/51, Wien 1901) S. 218-220