Wir Fridreich von gotes etc. [bechennen],^a daz wir unserm üben getriwen Alb(rechten) von Meinberg¹ für drizzich phunt, di wir im gelten solten und fu^er fumfzich phunt Wienner phenning, di wir im schuldich warn fu^er sinen dienst, versaczt heten dacz dem Chotwich vier und zweinczch mut vogthabern also, daz er oder sein housvrowe oder sein erben denselben habern alle jar innemen solten und haben ze rechtem phande, uncz si der achzich phunt von uns oder von unsern nahchomen wurden gewert. Ez solt ouch derselbe nucz an dem houbtgůt niht abgeslagen werden und wand der vorgenant Mainberger diselben saczung in allen rechten, als er sei von uns gehabt hat, unserm liben getriwen Rudolfen dem Wi^ersing verchouft und gegeben hat, darzů geben wir unser gunst und unsern gůten willen und wellen im und seiner housvrowen und sinen erben di saczung stet haben an allen irrsal und geben daruber etc. Datum anno domini MCCCX in die sancti Georii.

Source Fulltext: FUCHS, Göttweig I (=FRA II/51, Wien 1901) S. 256