Reverendis in Christo dominis et amicis ac fratribus predilectis domino Ulrico venerabili abbati, domino Wolfhardo priori totique conventui ecclesie Medlicensis Petrus dei gracia abbas, Helnwicus prior totumque capitulum ecclesie Chotwicensis cum devotis oracionibus reverenciam, fidem, spem universa hec confirmante fraterna caritate in filio virginis gloriose. Cum ex sentencia sapientissimi Salomonis, qui universis vite humane circumstanciis sive habitibus perlustratis sapiencia dei mediante, que in ipso clarius refulgebat, nichil in ipsa quam tribulacionem et afflictionem spiritus eundem didicerimus reperisse, cordibus nostris et cogitacionibus rationabiliter ac discrete revolventibus hoc frequenter animadvertimus universos labores humane fragilitatis nil posse tam dulciter recreare, quam si mutuis oracionibus ac aliis caritatis operibus quibuslibet secundum apostolum in alterutrum adiuvantes, vitam transitoriam debilem ac infirmam in perhennem et stabilem commutemus. Cum ergo domini et fratres karissimi^a de vestris sanctis oracionibus ac aliis religiosis operibus nostram neglienciam^a ac bonorum operum inopiam speremus pleniter ac uberius reformari, karitati^a vestre per presentes plenum participium missarum, oracionum, ieiuniorum, vigiliarum ac omnium bonorum operum, que in nostra ecclesia a nostra fragilitate poterint perpetrari, liberaliter ac hylariter fraternitatis nomine condonamus hac condicione inserta, ut quemcumque fratrum vestre ecclesie, sacerdotem vel dyaconem dominus vocaverit, huius carnis terminum ad extremum camerarius sive alter, qui habet ordinare de vestibus mortuorum, precium baiulo de ipsis vestibus defuncti tribuat, qui nobis mortem suam adnuntiet tempore oportuno. Et tunc prior noster sive vicem sui gerens mane capitulum convocabit et nobis indicet, ut in vespere sollempniter conpulsetur et maior vigilia dicatur pro eodem et in mane missa pro defunctis cum choro tonaliter celebretur singulis sacerdotibus missam unam nichilominus legentibus in sequestro. Et si diem illam, in qua defunctus annuntiatus fuerit, festum aliquod vel legitimum negocium impedierit, sequenti die, quod neglectum est, diligentius suppleatur. Et si aliquem illa die ex sacerdotibus vacare contigerit, quantocius eandem neglienciam^a suppleat, quando potest. Sanctimoniales vero nostre similiter in vespere compulsatis campanis, sollempniter maiores decantent vigilias, in mane vero unaquevis legat psalterium sigillatim,^a si vero festi excellencia seu arduum negocium hoc impedierit, ex tunc sequenti die evidencius compleatur et quicquid fit sacerdoti in divinis obsequiis, id debet cuilibet sanctimoniali totaliter exhiberi. Alii vero sacerdocii karakterem non habentes unum legant psalterium, conversi vero mille dicant: pater noster, salutacionem beate virginis cuilibet adiungentes, sacerdoti vero defuncto sive dyacono una prebenda eodem die videlicet deposicionis sue, que consuevit dari sacerdotibus sive dyaconibus, duobus scolaribus legentibus unum psalterium, tribuatur. Si vero in inferioribus ordinibus constituti videlicet subdyaconi, acoliti, conversi viam universe carnis ingressi fuerint, iterum nobis annuntietur et vigilias et missam unam celebrabimus in communi. Et ne pie recordacionis predecessores, fratres, sacerdotes ac cuiuscumque condicionis vestre et nostre ecclesie a tali pie devocionis voto aliquo modo separentur, statuimus, ut sexta feria festum omnium sanctorum proxime subsequente singulis annis sollempniter cum vigilia et missa ipsorum defunctorum ac vivorum fundatorum ac benefactorum celebretur memoria specialis, singulis sacerdotibus missam unam nichilominus legentibus in sequestro, aliis vero infra sacerdocium constitutis explentibus, que sunt superius adnotata ita, quod eodem die quatuor prebende dominorum pauperibus in remedium et levamen omnium fidelium defunctorum plenariter largiantur, volentes eciam, ut festivitas nostri fundatoris videlicet beati Altmanni singulis annis eodem, quo occurrerit die, apud vos cum septem luminibus peragatur, fratribus quoque de collegio existentibus septem fercula administrentur. Ad hoc idem faciendum cum festum beati Cholomanni occurrerit vestri patroni, nos inviolabiliter obligamus. Et ne hec fraternitatis perpetue inter nos et vos coniunctio ab aliquo in posterum valeat irritari vel in oblivionem devolvi, presentem paginam vobis damus sigillorum nostrorum robore communitam ita, quod versa vice nobis litteras vestris sigillis munitas remittatis convencionem fraternitatis huiusmodi confirmantes. Acta sunt autem hec anno domini MCCCXI, quarto nonas novembris in die sancti Eustachii martiris et sociorum eius.