Wir Agnes von gotes gnaden weilent chunigin ze Vngern veriehen und tůn chunt allen den, die disen brief sehent oder ho^erent lesen, daz wi^er mit verdachtem můt und mit gu^etlichem willen ze der zeit, do wi^er ez wol getu mochten, nach unsers beichtiger und nach ander gu^eter leut rate haben geschaffet und geben den erbern herren von Chotweig ze i^er goteshaus einen cehent an dem Phaffenberch, den wi^er von Nychlon dem Cehentner von Stain umb unser gu\t haben gechauffet, den wi^er mer denne rechte tag in nutze und in gewer gehabt haben, und haben in auch denselben chehent gegeben rechte und redeleich also, daz si in innehaben sullen und niezzen ewichleich an allen chrieg in allem dem rehte; als wir in innegehabt haben mit sogtaner beschaidenhait, daz si aller iaerchleich unsers lieben herren und wirtes chuneg Andres von Vngern, dem got gnade, iartag davon begen mit messen und mit vigilien an sand Felicis in pincis tag und mit allen gu^eten dingen, als gewonleich ist, und sol man von demselben cehent den oft genanten herren an unserm iartag einem igleichen ein trinchen und ein richte oder als gu^etes weines, sam der cehentwein ist, geben. Und sullen auch unsern iartag davon begen, als got uber uns gebiut, mit allen gu^eten dingen uf den tag, als er gevellet, und unsers vorgenanten Wirtes iartag fu^erbaz nach unserm tod mit dem unserm begen. Wer aber, daz die vorgenanten herren von Chotweig unsers lieben herren und Wirtes und unsern iartag mitsampt niht begiengen iaerchleich, als vorgeschriben ist, swa daz von iren wegen abgienge oder gesumet wurde, so wellen wi^er, daz der vorgenante cehent gevalle an daz goteshaus datz Melch an allen chrieg mit allem nutze und rechte, als wi^er in gegeben haben dem vorgenanten goteshaus von Chotweig, und sol auch ledich sein gentzichleich von demselben goteshaus an alle irresal und ist daz auzgenomen mit irem gu^etlichen willen. Ez sullen auch die herren von Melch, swenne seu der cehent angevellet, unsers lieben herren und Wirtes und unsern iartag iaerchleich davon begen uf die tage, als sie gevallen sein mit allen gu^eten dingen, als vor geschrieben ist. Und daz dise rede und sache ewichleich unzebrochen belibe, geben wi^er disen brief ze einem urchunde mit unserm insigel bestaetig. Der brief ist geben ze Rechperch, do man zalte von Christes gepurde tousant iar dre hundert iar danach in dem vierzehentestem iar an sand Gorientag.

Source Fulltext: FUCHS, Göttweig I (=FRA II/51, Wien 1901) S. 267-268