Ich Vlreich der Wolvareuter und Chu^enrat mein sun wir veriehen und tuen chund alle den, di disen prief ansehent, lesent oder lesen horent, die nu lebent und hernach chunftig werdent, daz uns der erber herr apt Marchart und deu samnung unser vraun gotshaus datz dem Chotweig deu gnad und deu fuedrung habent getan und uns den dienst an unserm hof datz Muetstal und waz darzue gehort westift und unwestift, versu^eht und unversu^eht, ze veld und ze dorf, da wier in alle iar van dienten funftzehen emmer weins, mit veraintem mu^et und mit gu^etem willen habent geringt und auch geminret, daz wier in fuerwaz und alle unser erben ewichleichen niht mer davan dienen schulten alle iar an sand Mertentag ze rehtem purchreht dann zwelif pfenning Wienner gemainer munizz in ieren hof datz Rauna und habent uns auch gegeben und allen unsern erben iers holtz bei der Peylstainwant zwai ieuch und nimer also, daz wier in alle iar an dem vorgenanten tag davan dienen ze rehtem purchreht nach landesreht und gewonhait in Osterreich zwen pfenning der vorgenanten munizz in den vorgenanten hof. Und durch derselben genaden und fuedrung willen hab wier ich Vlreich und ich Chuenrat, die vorgenanten, dem vorgenanten hern apt Marcharten und der samnung unser vraun gotshaus datz dem Chotweig genttzleichen und ledichleichen mit allem reht und nutz und gewer westift und unwestift, versu^eht und unversu^eht, ze veld und ze dorf, also wier iz und unser vodern van alten zeiten gehabt haben und herpraht mit verdahtem mu^et und mit unser pesten vreunt rat und mit guetem willen aller unser erben ze den zeiten, da wier iz wol getuen mahten, gegeben deu aigenschaft unsers rehten und vreyn aigens datz Woluareut¹ ainen hof, des drithalbs lechen ist, da wier in alle iar van dienen schullen an sand Mertentag ze rehtem purchreht in ieren hof ze Rauna acht pfenning Wienner gemainer munizz, und ain lechen daselben, da wier in van alle iar dienen schullen ze rehtem purchrecht an sand Mertentag zwen pfenning Wienner munizz in den hof ze Rauna, und geben in auch datz Wolfareut zwa hofstet und schullen in alle iar davan dienen zwen pfenning Wienner munizz an sand Mertentag ze rehtem purchreht in den hof ze Rauna. Wier geben in auch daz Woluareut zwai lechen, unser und unser vodern reht aigens chaufreht, da wier in alle iar van dienen schullen an sand Mertentag^a vier pfenning Wienner munizz ze rehtem purchreht in den hof ze Rauna,^b und geben in auch ain hofstat in dem Topel,² da wier in alle iar van dienen schullen ze rehtem purchreht an sand Mertentag vier pfenning Wienner munizz in iren hof ze Rauna. Und daz vorgenant gu^et, als daz wier in gegeben haben, daz hab wier wider enpfangen und genomen van dem erbern herren apt Marcharten ze rehtem purchreht nach landessit und gewonhait in Osterreich uns und allen unsern erben.^c Wier schullen auch noch unser erben und wer iz nach uns gewint daz vorgenant gu^et weder verchauffen noch verchummern noch versettzen dann mit dez herren hant dez apts van dem Chotweig. Und wann wier dez gutes iht verchauffen wellen, so schullen wier iz verchauffen nach purchrehts und landesreht und gewonhait in Osterreich. Wier schullen auch wier und unser erben und wer daz gu^et nach uns hat, ze ablait und anlait nimer geben, dann ein igleich gu^et dient, daz vorgenant ist. Is schol auch mit dem vorgenanten gu^et weder mit der vogtay, noch mit geriht nieman ze schaffen haben, dann unser herr der apt van dem Chotweig. Wurd aver ieman gevangen auf dem gu^et umb ein schuld, deu an den to^ed gieng, so schol man den gevangen mit unsers herren dez vorgenanten apts poten in daz geriht hintz Chotans geantwurten, als er mit guertel umbevangen ist. Und darüber ze ainem urchund geb wier dem erbern herren apt Marcharten und der samnung unser vraun gotshaus ze Chotweig disen prief versigelt und westiget mit der erbern^d herren insigel hern Jansen van Chunring und hern Chunrats dez Tiernstainer von Guetenprunn und ich Vlreich der Wolvareutter mit meinem insigel, wann mein sun Chunrat ze den zeiten niht aigens insigel het. Dez sind gezeug: her Chunrat von Arnstain, her Alber der Streitweser von Molnwerch, her Jans van Starchenwerch, her Ott van Weizzenwerch, her Jörg sein prueder, her Dietreich van dem Graben, her Ruemhart van Rauna, her Wernhart van Nuzdorf, her Chunrat sein sun, lantrihter ze den zeiten, her Hauch der Watenstainer, Vlreich der Wachawer, Vlreich der Woluareuter, Wisent van Prunn, Hainreich der rihter ze Rauna, Ott sein prueder, rihter ze Chotans, und ander erber leut, den deu red chund ist. Der prief ist gegeben, da van Christes gepurd ergangen waren tausent iar dreu hundert iar darnach in dem neuntzehentem iar an unser vraun tag in der vasten ze Stain, in der herren hof van dem Chotweig.

Source Fulltext: FUCHS, Göttweig I (=FRA II/51, Wien 1901) S. 285-287