Ich Vlreich von Meyssawe, marschalh in Osterreich, vergich und tuen chunt allen den, di disen brief ansehent oder ho^erent lesen, di nu lebent und hernach chunftich sint, daz ich mit verdahtem mu^eet und gueten willen aller meiner erben und gunst und hant meins genedigen herren pyscholfs Albrechts von Pazzawe han gegeben ledichleichen an alle ansprach dem erbern herren, hern Marcharten apt unser vrawen gotshaus datz Chotweig halben zehent, auf allen dem paue, daz geho^ert zu dem marcht datz Chotans walthaben bei der Chrems und drithail zehent dishalben desselben wazzer von demselben paue und halben zehent von vier dorfern: Veleins, Volrates,¹ Weicharteslag² und Heutzleins³ grozzen und chlainen, gestift und ungestift, versuecht und unversuecht und han im gegeben meines vreien aigens di aigenschaft des halben hofs datz Mvetstal, der vor halber sein was, den ze den zeiten het her Vlreich der Wolfreuter, und die aigenschaft zwaier lehen, die gelegen sint datz Scheibtz,⁴ die dient fumf Schilling phenning Wienner munzze, ze widerwehsel umb dritail zehent wein und getraid, grozzen und chlainen, gestift und ungestift, versuecht und unversuecht von drin und dreizzich lehen, die gelegen sint bei meinem haus datz Meyssawe, und ist der wechsel geschehen durch pessern nutz und gelegenhait der guet baidenthalben und des zehents und der aigenschaft, die ich han gegeben dem egenanten erbern herren apt Marcharten und seinem gotshaus datz Cho^etweig bin ich und mein erben sein scherm und gewer vuer alle ansprach nach recht und gewonhait des landes datz Osteri^ech. Und doruber zu einem waren gezeuch und zu einem sichtigen u^erchund gib ich im disen brief versigelt mit meinem insigel und mit meins swager insigel graf Chunrates von Schawenberch und mit hern Dietreich insigel von Pylchdorf, hauptmans in Osterrich, und mit meins ohaims insigel hern Stephans von Havnueld. Der brief ist gegeben und ditz ist geschehen, do von Christes geburd waren ergangen dreutzehen hundert iar und zwaintzich iar, dornach in dem andern iar an dem aufferttag datz Sand Polten.

Source Fulltext: FUCHS, Göttweig I (=FRA II/51, Wien 1901) S. 300-301