Reverendis in Christo patribus, dominis et amicis ac fratribus predilectis, domino Ottoni venerabili abbati, domino Helnwico priori totique conventui monasterii Chotwicensis Hainricus miseracione divina abbas, Cholomanus prior totumque collegium ecclesie sancti Lamberti in Altenburga cum devoto oracionum suffragio salutem et post decursum presentis certaminis regni bravium suscipere pro labore. Cum secundum Augustinum inter universa munera ecclesie nullum sit munus excellencius karitate^a ad hauc capescendam debemus tanto fervencius incitari, quanto evidenti constat nos per ipsam fieri membra Christi. Set^a revera aptissime illud erit, si iuxta consilium apostoli oraverimus pro invicem, ut salvemur, quia in multis offendimus omnes et sic alter alterius onus portet. Sane et ordinis conformitas et antique amicicie familiaritas merito exigunt et requirunt, ut inter nostrum et vestrum collegium quedam fiat unio spiritalis et fraternitas socialis, ut nobis una sit fides mencium et pietas accionum. Quare secundum consuetudinem aliarum ecclesiarum et religionum fraternitatis fedus et legem fide integra, karitate^a firma et non ficta mutuo indissolubiliter ineamus. Per hanc quidem in hac peregrinacione consolacionem et post hanc vitam requiem animarum poterimus adipisci. Considerantes igitur, quod argentum et aurum non est nobis, quibus divites peccata sua redimere consueverunt, pupilli absque patre et iam mortui sumus mundo et nisi nosmetipsos mutuis precibus et aliis bonis operibus adiuvemur, perit memoria nostra cum sonitu, quiave soli, cum ceciderit, non habet sublevantem aliquem, sed frater, qui a fratre iuvatur, tamquam turris fortitudinis comprobatur. Ut igitur unus spiritus et una fides amodo sit in nobis, debet ista fraternitatis lex scribi in cordibus nostris, ut filii, qui nascentur et exurgent, ea filiis suis narrent, multo dignius et salubrius quam amicicia Machabeorum et Romanorum, que conscripta in tabulis ereis servabatur. Decrevimus igitur sigillatim et expressius annotareque nos pro vobis et vos pro nobis statuimus facere in vita pariter et in morte. Karitatid^a igitur vestre per presentes plenum participium missarum oracionum ieiuniorum vigiliarum ac omnium bonorum operum, que in nostra ecclesia domino cooperante poterunt perpetrari, liberaliter et hylariter fraternitatis nomine condonamus hac condicione inserta, ut quemcunque fratrum vestre ecclesie sacerdotem vel dyaconem dominus vocaverit huius carnis terminum ad extremum, camerarius sive alter, qui habet ordinare de vestibus defunctorum, precium baiulo de ipsis vestibus defuncti tribuat, qui nobis mortem suam adnunciet tempore oportuno. Et tunc prior noster sive vicem sui gerens mane capitulum convocabit et nobis indicet, ut in vespere sollempniter compulsetur et maior vigilia dicatur pro eodem et in mane missa pro defunctis cum choro tonaliter celebretur singulis sacerdotibus missam unam nichilominus legentibus in sequestro. Et si die illa, in qua defunctus adnunciatur, fuerit festum aliquod vel legitimum negocium impedierit, sequenti die, quod neglectum est, diligencius suppleatur. Et si illa die aliquem ex sacerdotibus vacare contigerit, quantocius eandem negligenciam suppleat, quando potest. Alii vero saeerdocii karakterem non habentes unum legant psalterium, conversi vero et sorores mille dicant: pater noster, salutacionem beate virginis cuilibet adiungentes. Sacerdoti vero defuncto sive dyacono una prebenda eodem die videlicet deposicionis sue, que consuevit dari sacerdotibus sive dyaconibus, duobus scolaribus legentibus unum psalterium tribuatur. Si vero in inferioribus ordinibus constituti videlicet subdyaconi acoliti conversi sorores viam universe carnis ingressi fuerint, iterum nobis adnuncietur et vigilias et missam unam celebrabimus in communi. Et ne pie recordacionis predecessores, fratres, sacerdotes ac cuiuscumque condicionis vestre et nostre ecclesie a tam pie devocionis voto aliquomodo separentur, statuimus, ut sexta feria festum omnium sanctorum proxime subsequente singulis annis sollempniter cum vigilia et missa pro omnibus animabus apud nos defunctis celebretur, in vestro monasterio memoria specialis singulis sacerdotibus missam unam nichilominus legentibus in sequestro, aliis vero infra sacerdocium constitutis explentibus, que sunt superius annotata, ita quod eodem die quatuor prebende dominorum pauperibus in remedium et levamen omnium defunctorum plenariter largiantur. Et nos e converso pro omnibus, qui aput vos defuncti sunt, eque sollempniter memoriam peragemus annis singulis sexta feria festum ascensionis domini nostri proxime subsequente omnia observantes, que iam singulariter sunt premissa, volentes eciam ut anniversarius fundatricis nostre domine Hiltpurgis comitisse felicis memorie, qui est II.^b nonas decembris aput vos cum septem luminibus annis singulis peragatur, fratribus quoque de collegio existentibus septem fercula ministrentur. Ad hoc idem faciendum cum festivitas vestri fundatoris videlicet beati Altmanni occurrerit, nos inviolabiliter obligamus. Et ne hec fraternitatis inter nos et vos coniunccio ab aliquo valeat imposterum irritari vel in oblivionem devolvi, presentem paginam vobis damus sigillorum nostrorum robore communitam ita, quod versa vice nobis litteras vestris sigillis munitas remittatis, convencionem fraternitatis huiusmodi confirmantes. Acta sunt autem hec anno domini millesimo CCCXXVII, XVIII. kalendas maii in die beatorum martirum Tiburcii et Valeriani.

Source Fulltext: FUCHS, Göttweig I (=FRA II/51, Wien 1901) S. 324-327