Reverendis in Christo patribus dominis et amicis ac fratribus predilectis domino Hainrico abbati, domino Cholomanno priori totique conventui ecclesie sancti Lamberti in Altenburga Otto dei gracia abbas, Helenwicus prior totumque collegium monasterii Chotwicensis cum devotis oracionibus reverenciam fidem spem universa hec confirmante fraterna caritate in filio virginis gloriose. Cum ex sentencia sapientissimi Salomonis etc. Cum ergo domini et fratres karissimi de vestris sanctis oracionibus ac aliis religionis operibus nostram negligentiam ac bonorum operum inopiam speremus pleniter ac uberius reformari, karitati vestre per presentes plenum participium missarum oracionum ieiuniorum vigiliarum ac omnium bonorum operum, que in nostra ecclesia a nostra fragilitate poterunt perpetrari, liberaliter ac hylariter fraternitatis nomine condonamus hac condicione inserta, ut quantumcumque fratrum vestre ecclesie sacerdotem vel dyaconem dominus vocaverit, huius carnis terminum ad extremum camerarius sive alter, qui habet ordinare de vestibus mortuorum, precium baiulo de ipsis vestibus defuncti tribuat, qui nobis mortem suam adnunciet tempore oportuno. Et tunc prior noster sive vicem sui gerens mane capitulum convocabit et nobis indicet, ut in vespere sollempniter compulsetur et maior vigilia dicatur pro eodem et in mane missa pro defunctis cum choro tonaliter celebretur singulis sacerdotibus missam unam nichilominus legentibus in sequestro. Et si diem illam, in qua defunctus annunciatur, fuerit festum aliquod vel negociuin impedierit, sequenti die, quod neglectum est, diligencius suppleatur. Et si aliquem illa die ex sacerdotibus vacare contigerit, quantocius eandem neglienciam^a suppleat, quando potest. Alii vero sacerdocii karakterem non habentes unum legant psalterium, conversi vero et sorores mille dicant: pater noster, salutacionem beate virginis cuilibet adiungentes, sacerdoti vero defuncto sive dyacono una prebenda eodem die videlicet deposicionis sue, que consuevit dari sacerdotibus sive dyaconibus, duobus scolaribus legentibus unum psalterium tribuatur, si vero in inferioribus ordinibus constituti videlicet subdyaconi acoliti conversi sorores viam universe carnis ingressi fuerint, iterum nobis annuncietur et vigilias et missam unam celebrabimus in communi. Et ne pie recordacionis fratres, sacerdotes ac cuiuscumque condicionis predecessores^b a tam pie devocionis voto aliquo modo separentur, statuimus, ut sexta feria festum ascensionis domini proxime subsequente annis singulis sollempniter cum vigilia et missa ipsorum defunctorura ac vivorum celebretur, memoria specialis singulis sacerdotibus missam unam nichilominus legentibus in sequestro, aliis vero infra sacerdocium constitis^c explentibus, que sunt superius annotata ita, quod eodem die quatuor prebende dominorum pauperibus in remedium et levamen omnium fidelium defunctorum plenariter largiantur et nos e converso pro omnibus apud vos defunctis eque memoriam annis singulis peragemus videlicet feria sexta festum omnium sanctorum proxime subsequente. Volentes eciam, ut festivitas nostri fundatoris videlicet beati Altmanni singulis annis eodem, quo occurredit die, aput vos cum septem luminibus peragatur, fratribus quoque de collegio existentibus septem fercula ministrentur. Ad hoc idem faciendum cum anniversarius fundatricis vestre domine Hiltpurgis comitisse occurrerit, nos inviolabiliter obligamus. Et ne hec fraternitatis inter nos et vos communicacio ab aliquo valeat in posterum irritari vel in oblivionem devolvi, presentem paginam vobis damus sigillorum nostrorum robore communitam. Acta sunt autem hec anno domini millesimo CCCXXVII in die beati Georii martiris.

Source Fulltext: FUCHS, Göttweig I (=FRA II/51, Wien 1901) S. 328-330