Ich Chvnegvnt, hern Stephans witib von Hohenberch, dem got gnad, und Dytri^ech und Stephan mein sun wir veriehen an disem brif und tun chunt allen den, di in sehent oder horent lesen, di nu sint und hernach chunftig werdent, daz wir mit verdahtem mut und mit gutem willen ze den zeiten, do wir ez wol getun mohten, durch got ze fordrist und darnach durch des vorgenanten hern Stephans dem got gnad und aller unser vordern selhail willen haben gegeben unsers rechten aegens fünf pfunt Wienner pfenneng gelts auf gestiften holden, als hinnach geschriben stet, zu der chirchen in dem Halpach, daz da haizzet auf der Celle,¹ und haben uns geauzzent und vertzigen desselben guts wir und all unser erben immer ewichleich nur alsvil, daz wir schullen des guts erbefogt sein und schullen auch von dem gut ze fogtrecht niht mer nemen, denn ie von dem gut alle iar ein hun und schullen auch wir des guts scherm und gwer sein fur all ansprach und für all gerben. Ez ist auch daz daz gut, da di vorgenanten fünf pfunt gelts aufligent, im Plenichbach^a2 am Maierhof³ aen pfunt an sand Georgentag und aens an sand Michelstag, datz der Seydlinn auf der Stetten⁴ funf und sechzich pfenning an sand Poltentag und zwelf pfenneng an sand Michelstag, datz Wisentveld di Schvtzinne⁵ funf und zwaenzk pfenneng an sand Poltentag, im Swaerzenpach di Standhartinn⁶ drei schilling pfenneng an sand Poltentag und ze weinachten, ze ostern, ze pfingsten, ze igleicher hochzeit vier chaes halb Rabensteiner, ieden chaes fur siben pfenneng, an sand Michelstag zwai huner für vier pfenneng, ze vaschang zwai huner fur aht pfenneng, datz Marcharten an der Stainwant achzich pfenneng an sand Poltentag und zwen metzen habern an sand Michelstag, Leutold und Heinri^ech an der Stainwant datz den Dachslugern⁷ funfzich pfenneng an sand Pöltentag und ze pfingsten sechs chaes, ieden chaes für vier pfenneng, zwai huner an sand Michelstag für vier pfenneng, ze vaschang ein hun für vier pfenneng, an dem Hasenhof⁸ ein pfunt pfenneng, halb an sand Poltentag und halb an sand Michelstag, datz Traesem⁹ von des Zaendleins acher zwelf pfenneng an sand Michelstag, von des Crevher acher acht pfenneng und von des Hemerleins acher zwen pfenneng an sand Michelstag. Di vorgenanten gult und auch daz gut schol innehaben und nutzen, swer pfarrer und phleger ist datz Sand Veyt, und schol der davon haben ein gesellen, der all suntag und all feiertag an alain an den tagen, di hinnach geschriben stent, ein messe hab in der vorgenanten chirchen auf der Celle, ez sei danne daz ez snegefell guss herrenforcht sichtum oder ander ehaft not underste. Ez sind auch daz di tag, di der pfarrer von Sand Veit auf der Celle niht messe haben schol: sand Agathentag, sand Gregori-tag, sand Markstag, des heiligen chreuzestag, sand Virgilitag, sand Rvprehtstag, sand Cholmanstag. Ez sind auch daz di tag, di di pfarrleut zu der rehten pfarr ze chirchen gen schullen: an sand Stephanstag ze weinahten, des maentags nach dem ostertag, des maentags nach dem pfingstag, am entlaztag, am charfreitag, an sand Veitstag, an sand Lav-rentzentag, an di tag, di wir genennet haben, und an ehaft not, als vor geschriben stet, schol man all suntag und all feiertag und besunderli^ech von dem palmtag di vier tag nach einander untzen an den antlaztag von der pfarr datz Sand Veit ein mess haben in der egenanten chirchen auf der Celle und schol man do di di^b pfarrleut mit peicht und mit gotsleichnamen verrichten di vier tag. Geschaech aber chaen saumung an einer mess an eim suntag oder an eim feiertag von ehafter not, daz sol in der Wochen derfollet werden mit einer andern mess, und schol daz schaffen, swer pfarrer ist datz Sand Veit. Wer aber der pfarrer daran saumich, so schol ez von unsern wegen an unsern herren, den apt von Chotwi^eg mit endehafter potschaft praht werden. Der schol danne den pfarrer und den gesellen fur sich laden und swelher under in schuld hat, den schol er selbe pezzern vor seiner saumung in seim capitel nach sein ordensrecht. Wer aber di saumung ze groz, so schol er in datz Sand Veit vercheren und aenen darsetzen, der an dem vorgenanten gotsdinst auf der Celle niht saumich sei. Wir geluben auch daz hinenkegen für uns und fur all unser gerben, daz wir daz vorgenant gut und auch di holden an nichte beswaeren schullen, noch niht von in nemen, denne vor geschribet stet. Und daz daz stet behalten werd, geben wir vorgenant Dytri^ech und Stephan von Hohenberch disen brief versigelten mit unsern insigeln. Darzu sind auch gezeug unser vetern Chadolt der Altenburger und Haertneid der Wildeker mit iren insigeln. Und ist der brif gegeben, do man zalt von Christes gepurt dreuzehen hundert iar in dem aensundreizkistem iar darnach an sand Mathiastag des zwelfpoten.

Source Fulltext: FUCHS, Göttweig I (=FRA II/51, Wien 1901) S. 331-334