Ich Mert hern Hermans sun der Rudolffinne Enechel von Sande Polten, purger ze Wienne, und ich Anna sein hausvrow^e wi^er veriehn offenleichn an disem brief, daz der erber man Meinhart zu den zeiten wi^ert in der herren haus von dem Chotweich gechlagt hat an seins herren stat apt Wulfinge von dem Chotweich in der purger schranne ze Wienne vo^er rechtem gericht auf unser haus, daz da leit hinder dem Fleischmarchte zenêst Weicharts haus des Fleischacher und daz weilent meins swehers hern Wilhalms bey dem Brunne gewesen ist und daz uns mit lo^ez und mit furzicht gevallen ist gen andern erben umb zway phunt versezzens purchrecht alz verre, daz er tewer zwispilde darauf erlangt, danne daz haus wert waz. Nach der zeit hat uns der erber geistleich herr apt Wu^elfinch von dem Chotweich durch gebet willen der zwispilde begeben also mit auzgenomer rede, daz wir oder swer daz haus nach uns besitzt, das purchrecht furbaz alle iar ze rechten tegen antbu^erten schullen irem wi^ert in ir haus. Wêr aber, daz wir in daz purchrecht furbaz versezzen nach dehain dienstage uber acht tage, so sol danne furbaz an allez furbot und an alle chlage ye ze vi^ertzehen tagen zwispilde darauf gen alz verre, daz ez nicht tewer ist, und sol seu danne, swer statrichter ist hie ze Wienne, dezselben haus gewaltig machen allen i^eren frumen damit ze schaffen, alz umb versezzens purchrecht recht ist und der stat recht ze Wienne ze gelecher weis, sam ez mit vrag und mit u^ertail darauf erlangt sei vor rechtem gericht. Und des ze urchunde gebn wir in disen brief versigilt mit unserm insigil und mit meins vaters insigil hern Hermans der Rudolfinne Enechel von Sande Polten, der diser sach gezeug ist mit seinem insigel. Der brief ist gebn ze Wienne nach Christes geburde dreutzehenhundert iar darnach in dem drew und virtzigistem iar an dem aufferttag.

Source Fulltext: FUCHS, Göttweig I (=FRA II/51, Wien 1901) S. 401-402