Ich Chunrad von Velben vergich offenbar mit disem prief fu^er mich und fu^er mein eriben allen den, di in sehent, ho^ernt oder lesent, daz ich mit wolbedahtem muet nach rat meiner gu^eten freunt, meiner lieben ha^euzzfraw Offmein di gu^et, di hernach geschriben sind, ze Widerlegung ir^es heyratgu^ets fu^er dreuhundert pfunt Salzburcher pfenning gemacht und ingeantwurt han, das ist: ain hof ze Nidernsel, daz gu^et auf dem Ra^eut¹ pei Chaprunn, ain gu^et datz Lehen pei Chaprunn, ain gu^et datz Jochperch,² ain gu^et datz Entleiten, ein gu^et auf dem a^ew vellde, ein gu^et datz Steinach. Ain gu^et datz Scho^enpache³ und ain gu^et datz Perngarten und han i^er gezaigt dritthalb hundert pfunt pfenning, di si mi^er pracht hat, auf den gu^eten, di nu benennt wernt: ain swaig pei Hyeberch,⁴ haizzt Pru^eel, ain gu^et haizzt Pu^esemlehen, ain swaig haizzt An dem pache, ain hof, haizzt der Ro^etenpach, des Ta^eschleins lehen gelegen in dem marcht ze Mittersil und ain gu^et ze Stu^eluelden, haizzt daz Mesenlehen, di alleu von meinen herren von Salzburch und seinem gotshaus lehen sind, und han i^er darnach gemacht auch ze widerlegung ir^es heyratsgu^ets zwayhundert pfunt Salzburcher pfenning auf dem zehent ze Pu^esendorf,⁵ wo der gelegen ist, der von meinem herren von Chyemse und seinem gotshaus lehen ist, der sind hundert pfunt i^er morigengab, di mag si geben, wem si wil. Und diselben herren habent i^er di gu^et darnach mit ir^en priefen besta^ett, allsverr si von recht solten, daz si diselben gu^et innehaben und niezzen sol mit allen den eren rechten nu^etzen und gesu^echen, di darzu^e geho^ernt, besu^echt und unbesu^echt in aller der mazz, und ich di selber innegehabt han, also beschaidenleich, gewinnen wir chinder mit einander, di sullen diselben pfenning angevallen auf denselben gu^eten nach meiner vorgenanten hauzzfraw tod. Gewinnen wir awer nicht chinder mit einander, so sol si dannoch di vorgenant pfenning haben auf den gu^eten, diweil si lebt, und nach ir^em tod herwider an mich oder an mein nächst eriben gevallen. Dazselb sol auch sein von ir^em heyratgu^et, daz si mir pracht hat. Gewinnen wi^er chinder mit einander, der sol es sein, verfu^er awer si an chinder, so sol ich vorgenanter Chunrad diselben pfenning innehaben, diweil ich leb, und nach meinem to^ed su^ellen si wider an i^er nachst eriben gevallen. Das i^er daz also sta^et und unzebrochen beleib, gib ich i^er den offen prief mit meinem anhangundem insigel versigelt, der geben ist ze Salzburch an sand Chunigundentag von Christ gepurd dreuzehen hundert iar darnach in dem ains und fu^emftzkisten jar.

Source Fulltext: FUCHS, Göttweig I (=FRA II/51, Wien 1901) S. 454-455