Ich Chadolt von Hakenberch vergich und tuen chůnt mit disem brief allen den, di in sehent oder hornt lesen, umb die trayd zehent in Welnicher¹ pharr oder swo sie umb die pharr gelegen sind, die daz go^etshaws ze Cho^etwig angeho^ernt, die mein hausvraw^e, fraw^e Leukart gechaufft hat umb ir varund gut, da man demselben go^etshaw^os ze Cho^etwig jerichlichen von dient fumf mut trayds ze purchrecht, der ein viertail auz gantzm zehent von Weyglein ze Traysmaw^er und ein vyertail auz eim andern viertail desselben gantzen zehents von der Gruenpuchlin gechaufft ist, und diselb Wandlung und der chauf aller geschehen waz an herren hant und wider ein recht, wann die weil, waz mein herr abt Wulfinch ze Cho^etwig in rechtem und in redlichm chauff umb dieselben zehent, des er und sein gotshaws recht hat, davon er ir nicht leichen wolt, denselben unbillen habent uns herren und vrew^ent nidergelegt und abgenomen also, daz mein vargenanter gnediger her abt Wulfinch ze Cho^etwig meiner egenanten hausvraw^on die obgeschriben zehent gelihen hat unvertzigen aller seiner rechten und hat si mir di gemacht mit seiner hant ze einem satz fu^er achtzk phunt phenning Wienner munizze also mit beschaedner red, wann mein her abt Wulfinch ze Cho^etwig und sein nachomen mir oder meinen erben gebent achtzk phunt phenning Wienner munizze, so sind die anderthalb viertayl auz dem zehent ze Welnich, als var geschriben stet, des gotshaws ze Cho^etwig ledichlichen an all widered. Mochten si aber in churtzer zeit nicht gelosen, swann ich dann oder mein erben die zehent nicht lenger versparen mugen, so mugen wi^er sew versetzn oder verchauffen mit herren willen und mit herren hant eim geleichen mann, der uns under dem gotshaws darzue fueget, für diselben phenning und zu demselben rechten also, swann ein abt von Cho^etwig losen well umb di achtzk phunt phenning, daz derselb in dann ze losen geb an all widerred unde an allen chrieg. Ez schol auch losungzeit sein all iar zwischen weinachten und phingsten und ze chainer zeit mer. Und daz daz staet und unzebrochen beleib, gib ich disen brif versigelten mit meinem insigel. Darzue han ich gepeten den edln herren, hern Stephan von Hahenberch, herrn Ott den Teuffel, hern Cholmann von Hakenberch, Reynboten der Frael, daz si irew^e insigel zu einem gezeug an disen brif gelegt habent. Geben, do man zalt von Christ gepurd dreutzehen hundert jar darnach in dem ayns und fumtzkisten iar an sand Mertentag.

Source Fulltext: FUCHS, Göttweig I (=FRA II/51, Wien 1901) S. 462-464