Wir Rudmar¹ von gots genaden pyschof ze Seccaw und ich Chůnrad von Chuchel hauptman ze Salzburch und ich Hertneid sein brůder und ich Ekchart von Tann und ich Seybot von Nopping und ich Albrecht der Scheller und ich Ulreich der Chalezperger und ich Ulreich der Nuzdorfer, wir veriehen an disem brief, daz wir zwischen den edeln laewten hern Chůnrat von Velben an einem tail und hern Berchtolden von Losenstain an seiner můmen stat, di Jaensel der Velber, dem got genad, gehabt hat, an dem andern tail u^eber di stuch, die hinnach an unserm spruch geruert sind, also gesprochen haben, daz des vorgenanten Jansen des Velber wittib, di nu den Prunner hat, angevallen sol alles daz, daz in dem haws beliben ist und daz nicht rechtleich verschafft ist an chost an vih an gewant an pettgewant an chlaynaden und an phaerden. Waz aber derselb Jans andern laewten rechtleich geschafft hat auz der vorgeschriben hab, den sol daz auch beleiben iedem mensch eder an di stat als vil, als in geschafft ist. Was aber der vorgenant Jaensel der Velber an beraitschafft lazzen hat eder an purchrecht, daz ir nicht geschafft noch gemacht ist, da hat di vorgeschriben fraw nicht rechtz an, dann alsvil ir des geschafft ist. Daru^eber gebn wir disen brief versigelten mit unsers genaedigen herren, hern Ortolfs,² ertzbischof ze Salzburch, legat des stůls ze Rom insigel versigelten, der daz durch paider tail willen und auch durch unser Sprecher pet willen daran gelegt hat im an allen schaden. Gebn ze Salzburch an mittichen nach sand Mychelstag nach Christes geburd driutzehenhundert iar darnach in dem eines und fu^emftzikistem iar.

Source Fulltext: FUCHS, Göttweig I (=FRA II/51, Wien 1901) S. 461-462