Ich Chunigunt Go^etfrides hausvrow^e des Sebekchen von Wolfzpach vergich und tu^en chunt allen den, die disen brief lesent oder ho^erent lesen, die nu lebent unde hernach chunftig sint, daz ich mit gu^etem willen und mit wol verdachtem mu^et zu der zeit, da ich es wol getu^en macht, dem egenanten meinem wyert Go^etfriden dem Sebekchen gemacht und geben han ze rechter haymstewr noch des landes recht ze O^esterreich alle die gu^eter, die hernach geschriben stent und die mi^er auch an rechtem tayl gegen meiner tochter Agnesen Otten hausvrow^e des Vischamunder gevallen sind, zu^e der zeit, da wi^er mit furtzicht und mit las mit einander getaylt haben alle die gu^eter, die wi^er ze recht mit einander tayln solden, als auch unser taylbrief sagent, und die uns auch mein erster wiert Dyetreich der Gyleis, dem got genade, hinder im lazzen hat oder die uns von meinem vater, hern Micheln dem Syerndorfer, anerstarben und gevallen sind, dem got genade, oder von swem es hercho^emen sey, es sei aygen lehen purchrecht oder perchrecht, swie so daz genant ist: des ersten einen hof gelegen ze Pusenperge,¹ der rechtes purchrecht ist, davon man jaerleich dient vier Wienner phenning hintz Sant Veit² under dem Pusenperge in der chirichen auf den alter zu^e einem vreyn purchrecht und nicht mer und auch alles daz, daz zu^e demselben hof geho^eret, weingarten ekcher holtz ze velde und ze dorfe, es sey gestift oder ungestift, versuecht oder unversuecht, swie so daz genant ist, und sechs und zwayntzich emmer weins geltes perchrechtes an dem Pusenperge auf weinga^erten und die fu^ergedingphenning, die darzu^e geho^erent, daz rechtes aygen ist und der weintzehent halber daselbs an dem Pusenperge, der des egenanten Dyetreichs des Gyleis gewesen ist und der lehen ist von dem hertzogen in O^esterreich, und newn schilling und zehen phenning geltes gelegen daselbs ze Pusenperge auf vier hofsteten, da zu^e den zeiten aufgesezzen sind und auch dieselben gult dienent: des ersten Vikerlin ein halbs phunt, Jans der Waytz sybentzich phenning, Herlin fumf und viertzich phenning und Go^eschel fumf und vietzich^a phenning, unde daz rechtes aygen ist, und ayn phunt phenning geltes an dem Wolfzekk auf sechs hofsteten, da auch zu^e den Zeiten aufgesezzen sind und dieselben gult davon dienent Hainreich der Mulner vietzich^a phenning, Niclas viertzich phenning, Chunrat viertzich phenning, der Waekkinger viertzich phenning, Chuentzel viertzich phenning und Werntzel viertzich phenning, daz lehen ist von dem hertzogen in O^esterreich und achtzehen jeuch akchers daselbens, die in den egenanten hof geho^erent und die auch lehen sint von den hertzogen in O^esterreich und viertzich phenning geltes auf weingarten und auf purchrecht ekchern, daz auch aygen ist. Die vorgenanten gu^eter alle han ich dem egenanten meinem wyert Go^etfriden dem Sebekchen recht und redleich gegeben und gemacht mit lehenherren und mit purchherren handen also mit ausgenomener rede: ist daz wi^er bayde leibleich erben miteinander gewinnen, da suln die vorgenanten gu^eter alle noch unser payder tod auferben und gevallen an allen chrieg. Waer aber daz ich vorgenante Chunigunt abgienge und sturib und nicht chinde mit dem egenanten meinen wiert hiet, des got nicht engeb, so sol denn derselbe mein wiert Go^etfrid der Sebekch die obgenanten gu^eter alle fu^erbas nach meinem tode ledichleich und freileich haben und allen seinen frumen damit ze schaffen verchauffen versetzen und geben, swem er welle an allen irr^esal, so im daz aller pest cho^em und fu^ege. Waer aber daz, daz der egenant mein wyert Go^etfrid abgienge und sturib ee wenn ich, daz ich den uberlebt und wier doch nicht chinde mit einander hieten, so suln die obgenanten gu^eter alle denn ledichleich herwider erben und gevallen auf mich vorgenante Chunigunten also, daz ich auch damit sol fu^erbas ledichleich und vreyleich allen meinen frumen schaffen mit verchauffen und versetzen, schaffen und geben, swem ich welle, so mir daz aller pest cho^em und fu^eege an allen chrieg und i^erresal. Und daz ditz gemaecht in dem rechten, als vor geschriben stet, fu^erbas also staet und untzebrochen beleib, und wand ich vorgenante Chunigunt selber nicht aygens insigils enhan, daruber so gib ich dem obgenanten meinem wyert Gotfriden dem Sebekchen disen brief zu^e einem offen urchund und zu^e einem waren gezeug diser sache versigelten mit des erbern priester insigil hern Hainreichs zu^e den zelten verweser an des pharrer stat der egenanten pharrchirichen datz Sant Veit und mit der erbern leut insigilen Niclas und Ruegers der pru^eder von Engelberstorf und Leupolts und Hansen der pru^eder der Daechssenpekchen und Hansen des Syerndorffer von Graeuendorf und Perichtolts des Schiuers, die ich des fleizzichleich gepeten han, daz si alle diser Sache gezeugen sind mit i^ern insigilen, und verpint auch ich mich mit meinen trew^en under der egenanten insigilen allez daz gaentzleich staet ze haben und ze laysten, als vor an disem brief geschriben stet. Der brief ist geben ze Wienne nach Christes gepu^erde dreutzehen hundert jar darnach in dem new^en und fumftzigisten jar an sant Larentzentage.

Source Fulltext: FUCHS, Göttweig I (=FRA II/51, Wien 1901) S. 511-513