Wi^er Seyfrid von gots gnaden abt ze Altenburch, obman des chriegs zwischen den erbern geystleichen herren abt VIreichen und seinem convent ze Cho^etweig an ainem tail und abt Eberhartz und seinem convent ze Zwetel an dem andern tail, des chriegs sew hin vier gegangen worn mit gu^eten willen von des chriegs willen des werdes, der gelegen ist pei Chrems gen Chotweigeraw^e uber und darumb di vier¹ uberain nicht chomen mechten, nach den vorgnanten chrieg gerichten mechten, und des sind di vorgnanten geystleichen herren und ir convent gantz und gar und an alles gevaer hinder uns gegangen nach der puntprief sag, di si uns darumb gugeben^a habent. Nu sprechen wi^er egnanter abt Seyfrid nach gu^eter gewizzen und nach zeitigen rat den obgenanten werd mit aller zugehorung dem vorgnanten abt Vlreichen und seym convent ze Chotweig fu^erbaz freylich ze haben, ez sey waid holtz wazzer oder grunt, daz zu dem vorgenanten werd gehort, swi^e daz genant sey, und mugen auch allen frum damit schaffen versetzen verchauffen und geben, wem si wellent, und auch mit allen rechten, als werd und wazzersrecht ist und des landes recht in Osterreich. Und schullen auch der vorgnant herr abt Eberhart und sein convent ze Zwetel und all ir nachchomen dem vorgenanten herren abt Vlreichen und dem convent ze Cho^etweig und allen irn nachchomen chain irrung tu^en nach chrieg an dem vorgnanten werd und waz darzu^e gehort, weder geystleich noch weltleich weder vil nach wenich. Und schol auch der vorgnant abt Eberhart und sein convent ze Zwetel den erbern herren abt Vlreichen und seinem convent ze Cho^etweig daz westeten mit ir^em prief versigelten mit i^ern payden insigeln und zu pezzer sicherhait der sach mit des erbern geystleichen herren abt Cholmans von dem Heyligen Chrewtz insigel zu zewg. Und wenn dazselb geschiecht, so schol der erber herr abt Vlreich von Chotweig und sein convent dem oftgenanten abt Eberharten und seinem convent ze Zwetel sibentzk phunt Wienner phenning vermachen mit priefen oder mit purgerln, wie si daz haben wellent, also mit ausgenumer red, daz si in di sibentzk phunt Wienner phenning halb geben schullen des suntags ze mittervasten und halb ze sunbenten. Und welcher under in den spruch, also vor geschriben stet, nicht stet hyet oder volfu^ert zwischen unser vrawntag, der nu schirist chumpt, der ist uns vervallen aller der punt, der sew sich versprochen habent gegen uns mit iren priefen.

Source Fulltext: FUCHS, Göttweig I (=FRA II/51, Wien 1901) S. 580-581