Ich Vlreich der Neydekker, di zeit pu^erkgraf ze Chrems, ich Fridreich der Rueschel, di zeit mautter ze Stain, ich Gylig di zeit dez rats und judenrichter ze Chrems und ich Chu^enrat der Reychersperger, purger und auch di zeit des rats ze Chrems, wir vergehen offenleich mit dem prief und tu^en chunt allen den, dew in sehent oder ho^erent lesen, daz di erbern laeut vrow Anna, Otten saeligs dez Fleischhakcher to^echter, purgerin ze Chrems, an ainem tail und vrow Elzspeth von Ampsteten desselben Otten wytib an irer zwayr chinder stat, die si pey im hat, Jennslein und Aenndlein an dem andern tail miteinander chrieghafft und mysshelig sind gewesen umb i^eren eribtail von der eribgueter wegen, di derselbig Ott saelig nach seinem to^ed hinder im lazzen hat, di gelegen sind ze Chrems in der stat: ain fleyschpankch an dem Hohenmarkcht,¹ zway haewser gelegen pey einander auf unser vrown perig zenest Jannsen des Jntimer haws und ain gaertel gelegen pey dem pessarn haws und stozzet an unser vrown freythof. Derselben chrieg und misshelung sind sew ze payder seit mit guetleichem willen hinder uns gegangen und in di hennde gegeben und habent uns vleizzichleich gepeten, daz wier paydew minn und recht do^eruber erfinden und sprechen scholden nach payder tail fu^erlegung und waz wier do^eruber spraechen, do wolden sew ewichleich pey beleiben an alle widerred. Nu hab wier doruber gesprochen und sprechen auch mit dem prief, daz man di vo^ergenanten eribgueter gleich entzway schol tailen do^erumb lo^ezzen, und schol di vo^ergenant vrow Anna halben tail ledichleich haben mit allen nu^etzen ze versetzen und ze verchauffen und geben, wem si wil, so schullen di vo^ergenanten zway chinder Jennsel und Aenndel und ir egenante mueter vrow Elzspeth mit sampt in den andern halben tail auch ledichleich haben mit allen nu^etzen und doch unverchumert so lang, untz daz di chinder vo^egtperig werden. Und wann dew chinder zu i^ern beschayden iaren choment und vo^egtperig sind, so mu^egen sew irem tail furbaz wol tuen und geben, wem sew wellen, an alle i^errung. Ist aber, daz di egenanten chinder paydew abgent mit dem to^ed und sterbent, ee dann sew vogtperig werdent, so schol i^er egenanter eribtail nynndert anderswo hingevallen dann auf irew egenante swester vrown Annen. Auch so schol die vo^ergenant vrow Elzspeth alle varunde hab und gueter, di i^er vo^ergenanter wiert Ott saelig nach seinem tod hinder im lazzen hat, ledichleich haben und domit tu^en und geben, wem si wil. Und swelher tail under in uns unsern Spruch nicht staet behielt und dowider taet, der des uberwaert wurd, derselbig tail ist ze wyderwett vervallen unserm herren, hern Haydenreichen von Meyssaw, obristem schenkch in Oo^esterreich, dreizzik phunt und uns spruchlaeuten zwamtzik phunt Wyenner phenning an alle genad und hat do^erzu^e alle seinew recht an den vo^ergenanten guetern verloren. Daz di red also staet sey und hinfu^er gantz und unzebrochen beleib, doruber so geben wier in den offen prief ze einem warem sychtigem urchund und ze einer ewigen vestigung der sach versygelten mit unserer obgenanten vierer anhangunden insygeln uns an schaden. Der prief ist geben nach Christi gepu^erd dreutzehen hundert iar do^ernach in dem fumf und sybentzkistem iar an sand Georigentag.

Source Fulltext: FUCHS, Göttweig I (=FRA II/51, Wien 1901) S. 625-626