Ich Vrban zu^e den zeiten pharrer unser fraw^en chirhen ze Maw^er vergich fu^er mich und fu^er all mein nachko^emen pharrer dasselbs offenlich mit dem brief allen den, di in sehent ho^ernt oder lesent, di nu lebent und hernach chu^enftig sind, daz mi^er und meiner vorgenanten unser frawn chirhen ze Maw^er di erber fraw^e Kathrei, Pa^euls des Redlêr hawsvrow^e, und Janns von Pyelach ir sun und Margret und Anna der egenanten fraw^en Kathrein to^echter und all ir erben recht und redlichen gegeben habent nach irs brief sag, den ich daru^eber hab, irs rechten purkchrecht^es und dienst^es aindlef phunt gemainer Wienner phenning gelt^es, di gelegen sind auf den nachgeschriben gu^etern jêrliches di^enst^es: von erst Thoman der Pêndel von Rozzaczz und Anna sein hawsvrow^e dienent von ainem weingarten daselbs genant der Praitenaschahêr ain phunt phenning alle iar an sand Mertentag und da man von ze purkchrecht gibt dem edlen herren . . von Waltse alle iar fu^emftzehen phenning und Wolfharten dem Jungenwirtt in sein hueb zwelif phenning, Symon dem Tenkchen in sein hueb zwelif phenning und Merten dem Laymêr in sein lehen sechs phenning alle iar an sand Michelstag; so dient Hiltprant von Akchspach und fraw Clara sein hawsvraw^e von dem alten pawngarten gelegen daselbs alle iar fu^emf phunt und sechs schilling phenning zu zwain têgen an aller mann vaschangtag an dreizzikch drew^e phunt phenning und an sand Cholmanstag an dreizzikch drew^e phunt phenning und dafu^er habent si ze ebentew^er gesaczt irn weingarten gelegen an der Mu^elleiten, genant der Lindnêr, da man von di^ent in daz gemain purkchrecht alle iar fu^emfthalben phenning an sand Michelstage; so dient Hainreich Prechtel von Akchspach und Kathrei sein haw^esvraw^e von aim pawngarten daselbs, genant der Stegêr, alle iar drew^e phunt phenning zu^e zwain têgen zwelif schilling an unser frawntag zder liechtmess und zwelif schilling phenning ze mittervasten, und da man von di^ent in daz gemain purkchrecht alle iar sechs phenning an sand Michelstag und habent dafu^er ze ebentew^er gesaczt irr weingarten gelegen an dem Plental zenachst dem perig, da man von geit ze purkchrecht Hermann von Ibs in den perig alle iar acht phenning an sand Michelstag, so dient Jacob der Padêr von Akchspach und Margret sein hawsvraw^e von aim weingarten und paw^engarten bei einander gelegen bei der gazzen, gnant der Prueschinkch, alle iar ain phunt phenning zu^e zwain têgen ein halbs phunt phenning auf unser fraw^en tag zder liechtmess und ain halbs phunt phenning ze phingsten, und da man von geit ze purkchrecht alle iar in daz gemain purkchrecht vier phenning an sand Michelstag, so dient Fridreich der Gnêsgern, Vlreich der Zo^etel und Stephan der Totenschu^eechel von aim weingarten ze Akchspach, genant der Tanpekch, und leit ob der Twirich, dez yeder man ein drittail innhat, da man von dient in daz gemain purkchrecht alle iar sechs phenning und von dem weg amen phenning alle iar an sand Michelstag und dient davon alle iar an sand Mertentag zwelif Schilling phenning. Desselben dienst^es habent si gegeben sechczig phenning, daz di^e vorgenanten aindlef phunt phenning gelt^es gancz sein und daran icht abge von welherlai sachen daz wer oder geschêche, daz sol man haben auf denselben zehen schilling phenning gelt^es. Dieselben vorgenanten aindlef phunt phenning gelt^es mit allen den ern nu^eczen und rechten, als si selb die unversprochenlich in purkchrecht^es und dienst^es weise innegehabt habent und ouch herpracht habent, also habent si mi^er die gemacht und ge-geben und gebent ouch di^e mit dem brief di vorgenant fraw^e Kathrei und Janns ir sun von Pielach und Margret und Anna ir to^echter und all ir erben mi^er vorgenanten Vrbann di zeit pharrer ze Maw^er demselben meinem goczha^eus unser fraw^en chirhen ze Maw^er und allen meinen nachko^emen pharrer^en daselbs fu^erbas ewikchleich da ze beleiben und allen unsern frum damit ze schaffen, wie uns daz allerpest fu^egund ist, dorumb wir und all unser nachko^emen, pharrer ze Maw^er oder wer derselben chirhen verweser ist, got ze lo^eb und ze dienst und unser fraw^en und allen heiligen ze eren und ze hilf und ze trost allen irn vorvodern und nachko^emen seien und auch allen gelawbhêftigen seien und sunderlich zu einer ewigen gedechtnu^ezz Symons seligen von Pyelach, der obgenanten fraw^en Kathrein wirt, fu^emf ewig mess alle wochen sprechen und awsrichten und verwesen su^ellen in sand Gilgen chappellen in der vest ze Pyelach am mess all suntag und so su^ellen wi^er di heiligen zeit chu^enden und piten umb lebentig und umb tode und sunderlich umb alle die, di^e fu^edrer und helffêr sind an der obgenanten stift und darzu^e den weichprunn da gesegen, di ander mess all mêntag, di dritt mess all mitichen, di vierd mess all vreytag und di fu^emft mess all sampcztag nacheinander. Wer aber, daz veyrtêg an den eritag oder phincztag in der wochen gevielen, so sol man ouch mess sprechen in der egenanten chappellen ze Pyelach und sol man dann dafur veyrn ander werichtêg in derselben wochen vor oder nach, denn an den vier unser frawn têgen und an dem chirichweichtag, so sol ich obgenanter Vrban pharrer unser frawnchirhen ze Mawr oder mein nachko^emen pharrer daselbs der mess in der vorgenanten chappellen ze Pielach u^eberhaben und ledig sein ze sprechen und die haben ze Maw^er. Man sol ouch in der chappellen ze Pyelach alle iar iêrlich all weychnachten ein metten singen und drei mess sprechen und ze mittervasten ain tag an der peicht siezen und ze o^estern am mess singen und darzu^e di chost weihen, als gewo^endlichen ist. Wenn ouch der priester mess sprechen wil, so sol man in nicht sa^ewmen mit aller beraitschaft zu^e der mess. Wêr aber, daz ich obgenanter Vrban pharrer unser fraw^en chirhen ze Maw^er oder mein nachko^emen pharrer daselbs oder swer derselben chirhen verwesêr ist, an den obgenanten messen sawmig wêrn, alsoft dann ein mess in der egenanten chapellen ze Py^elach nicht gesprochen wu^erde zu^e den têgen, so vorbenant ist, und daz di ouch nicht ervolt und volpracht wurden darnach in dem nächsten mo^eneyd, so sol ich obgenanter Vrban pharrer unser frawn chirhen ze Maw^er oder mein nachko^emen daselbs fu^er ein y^egliche mess aines halben phund wachs oder zwelif Wienner phenning vervallen sein ze geben zu derselben chappellen ze Pyelach. Wolt aber ich vorgenanter Vrban pharrer ze Maw^er oder mein nachko^emen pharrer derselben unser frawn chirhen ze Maw^er des wider sein, so sol uns di obgenant fraw Kathrei, Pauls des Redlêr hawsvraw^e, Jans von Pyelach ir sun oder Margret und Anna ir to^echtêr mitsampt irn erben oder wer zu der zeit herr und verweser ist derselben egenanten vest ze Pielach, frew^entlich darumb ermanen und ze red seczen, daz wir daz geben. Wolt aber ein pharrer ze Maw^er dez lenger wider sein und daz er ouch di obgenanten sawmung der mess nicht widertet und volprecht, so sullen si daz prinngen an unsern genêdigen herren den bischof ze Pazzaw^e oder an seinen anwolt und der sol einen y^eglichen pharrer dacz der egenanten unser frawn chirhen ze Maw^er darumb no^etten so long, uncz daz er all sawmung volprinng, als oben an dem brief geschriben stet. Und wenn auch chirichweich und chirichtêg sind in der obgenanten sand Giligen chappellen ze Pielach, so sol man an denselben abenten ain vesper und an den margen ain mess singen, als sit und gewonhait ist. Si sind ouch der obgenanten gu^elt aines y^eglichen pharrer unser frawn chirhen ze Maw^er recht gewern und scherm fu^er all ansprach, als purkchrechts und dienst^es recht ist in dem lande ze Osterreich. Gieng uns aber daran icht ab mit recht, daz su^ellen wir haben dacz in und auf allen den gu^etem, di si habent in dem lande ze o^esterreich., si sein lebentig oder tode. Und des zu einem warn urchund so gib ich obgenanter Vrban pharrer unser fraw^en chirhen ze Maw^er fu^er mich und fur all mein nachko^emen pharrer daselbs den egenanten frawn Kathrein, Pauls dez Redlêr hawsvraw^en, Jansen von Pielach irm su^en und Margreten und Annen irn to^echtern und allen irn erben den brief besiglten mit meinem insigl. Und der sach sind geczew^egen di erwi^erdigen und geistliche mein genêdig herren her Vlreich abt des goczhau^es ze Cho^etweig und der convent daselbs mit ir^en baiden anhangunden insigeln, di der egenanten meiner chirchen recht lehenherren sind, mit der gunst und willen ich die obgenanten sach gewandelt hab. Der brief ist geben an sand Philipps und sand Jacobstag der heiligen zwelifpoten nach Christi gepu^erde drewczehen hundert iar und in dem siben und sibenczkistem jare.

Source Fulltext: FUCHS, Göttweig I (=FRA II/51, Wien 1901) S. 636-640