Ich Gebhart der Grêfel, diezeit richter ze Fuert der gueter des chlosters ze Chotweig, vergich offenlichen mit dem prief, das mein herr abpt Fridreich¹ ze Chotweig gesezzen ist in offner schrann ze Kotweig vor dem fro^encheller und frògt des rechtens, in wer versezzen ain halb phunt phenning puerchrechtes mêniger iar, wenn ains von dem hof dacz Hedreinswerd und von aller seiner zuegehorung, den Vlreich von Rorr inhat, und derselb Vlreich sprêch, er wer sein vreyes aÿgen und wolt im und seinem gotshaus denselben hof encziehen und von dem gotshaus entfromden und têt das alles uber sein und seines gotshaus willen und pat vragen, was recht wer. Da geviel meinem herren abpt Fridreichen¹ zu dem rechten, er solt ainen an sein selbs stat seczen und im das stebel und das gericht emphelchen, der im recht têt hincz dem obgenanten hof umb das versezzen pu^erchrecht meniger iar, wenn ains und umb alle die wandel, die nach des landes recht in O^esterreich mit zwispild darauf gegangen sind, und auch umb das entfro^emden, das mon den hof in aÿgens gewer zewcht über sein und seines gotshausses willen. Do saczt mich der egenant^a abpt Fridreich¹ mein herr an das recht und stu^end auf und chlagt vor mein und dem erbern geding mit vorsprechen und mit weiser hincz Vireichen vom Ro^err darumb, das er im von dem vorgenanten hof und seiner zuegehorung versessen hiet ain halb phunt phenning puerchrechtes mêniger iar den ains und umb all die wandel, die mit zwispil darauf gegangen sind nach des landes recht und gewo^enhait in O^esterreich und auch darumb, daz mon im und seinem gotshaus^b denselben grünt encziehen und entfromden wolt und den in aygens gewer zug über sein willen und pat rechtens. Do geviel aver zu dem rechtem, ich solt den vorgenanten Vlrichen von Ro^err laden mit ainem verschriben fuerbot, das er chem von dem tag des rechtens der ersten chlag uber vierczehen tag und sich umb den obgenanten zuespru^ech gen meinen herrn abpt Fridreichen verantbuerten, alz er des geniezzen wolt. Do ladung geschach mit meinem verschriben fuerbot, und do der vierczehent tag cho^em, darauf der egenant Vlreich von Rorr geladen ward. Do cham er nicht, do chom aver der egenant mein herr der apt mit vorsprechen und mit weiser und chlagt vor mein in offner schrann umb allen den handel, alz er vor chlagt het und pat rechts. Do geviel aver zu dem rechten, mon solt den egenanten VIreichen vom Ro^err zu dem andern mal laden, alz mon in vormalen geladen het. De ladung geschach aver mit ainem geschriben fuerbot, das er chêm uber vierczehen tag und verantbuertet sich, als er des geniezzen wolt. Do derselb rechttag chom, do chom aver der egenant mein herr abpt Fridreich¹ fuer mich und den erbern gedingen, do ich sas in offner schran an dem rechten, und chlagt mit vorsprechen und mit weiser umb allen den handel, da er vor umb chlagt het, und da der egenant Vlreich vom Rorr umb geladen was. Do chom derselb Vlreich auf die antbuerrt nicht. Do ward erfunden, mon solt fro^enpoten verho^eren, ob er daz fuerbot Vireichen vom Rorr ze rechter zeit pracht hiet. Der sagt bei sein trewn, alz ein fu^erbot sagen sol, er hiet im de fuerbot ze rechter zeit pracht und geben. Do word gevragt, seind er zu dem rechten vron nicht chomen wer nach der ladung und mon in getan het und in auch niemant ehafter no^et beredet, was vronrecht wer. Da geviel aver zu dem rechten von allen erbern lewten, di des tags an der srann saczen, von man ze man, es solt meinem herrn abpt Fridreichen¹ und seinem gotshaus der egenant hof mit aller seiner zuegehorung gênczlichen und gar vervallen sein fuer das versezzen puerchrecht und fu^er di versezzen wandel, die sich mit zwispil nach des landes recht und gewo^enhait ze o^esterreich darauf vergangen hieten und auch umb die entfro^emdum, die mon i^em und seinem gotshaus gern têt mit de, das mon im den grünt zu aygens gewêr wolt ziechen, und des solt ich im meinen gerichtsprief geben. Das hab ich getan, und solt in auch des vorgenanten hofs mit seiner zuegehorung zu nucz und zu gewer seczen. Das hab ich auch getan mit u^erchund des priefs versigelt mit meinem anhangundem insigel. Geben am mittechen vor sand Margretentag nach Christi gebuerd drewczehen hundert iar darnach in dem ains und achczigistem iar.

Source Fulltext: FUCHS, Göttweig I (=FRA II/51, Wien 1901) S. 664-666