Nos Georius¹ dei et apostolice sedis gracia episcopus Pataviensis profitemur et publice recognoscimus per presentes, quod in Christo nobis dilectus frater Fridricus abbas monasterii in Chotwico ordinis sancti Benedicti nostre dyocesis ad nostram deduxit noticiam, quomodo ad gloriam dei omnipotentis et honorem beate dei genitricis Marie semper virginis ac omnium sanctorum et electorum dei et ex speciali pie devocionis affectu sancte Katherine virginis ac martiris gloriose divinique cultus augmentacione ad salutem anime sue suorumque predecessorum ac successorum sufficienti deliberacione previa infrascripta bona redditus et iura nichil dominii vel iuris in eisdem bonis sibi aut suis successoribus dicti monasterii reservando libere donavit contulit penitus et assignavit conventui ac fratribus monasterii predicti ad fundacionem perpetue misse super altari in capella beate Katherine in dicto monasterio sita omni die perpetuis temporibus celebrande videlicet in die dominico de sancta trinitate, feria secunda pro fidelibus defunctis, feria tercia de sancta Katherina, feria quarta de sancta Dorothea, feria quinta de corpore Christi, feria sexta de sancta cruce, sabbato de beata Maria virgine salvo, quod in specialibus festivitatibus, cum in dictis diebus venerint vel occurrerint specialia, missa-rum officia huiusmodi festivitatum debite celebrentur, quod eciam dicti fratres et conventus fide promiserunt firmiter adinplere et iugiter ut premittitur observare. Bona autem ad hec deputata sunt hec: primo due libre denariorum in Naprestorf empte ab Vlrico Chrueger, item XII solidi denariorum in Langanlebarn empti ab Elizabet Pirchuelderin, item una libra denariorum de beneficio Ottonis Wyser, item IX urne musti super tribus vineis officii vinitorii empte a Volchlino de Tawrn, item tota decima maior et minor in Tawrn empta a Michaele Chyenbergario et a Martino filio camerarii, item domus seu habitacio in Newnburg empta a Strawslino, que quondam fuît Wysentonis, item XXV libre denariorum, quas Wlfel, filius procuratoris, solvere tenetur seu obligatur. Que quidem bona predicta idem frater Fridricus abbas per industriam propriam acquisivit et ad predicte misse fundacionem ut supra libere contulit et donavit. Preterea frater, qui fuerit oblagiarius dicti conventus, presbytero huiusmodi missam celebranti porriget octo denarios Wyenenses de fructibus predictis, sed residuis bonis in die anniversarii ad distribuendum pro conventus utilitate secundum consilium seniorum fratrum debite reservatis. Insuper cum frater Fridricus abbas predictus ab hoc seculo migraverit, conventus et fratres predicti exsequias et singulis annis anniversarium vigiliis ac missis pro defuncto solempter^a ac fideliter peragere tenebuntur. Fratres eciam predicti qualibet ebdomada feria quarta vel alio die missam de sancta Dorothea, si festivitas specialis non obsteterit, solempniter celebrabrit.^b Item si frater ad celebrandas missas huiusmodi vel si provisor oblagie in dando pecuniam predictam negligens fuerit, ad arbitrium prioris, qui pro tempore fuerit, racionabiliter punietur et ad inpletam execucionem premissorum regulariter coartetur. Eciam oblagiarius de bonis predictis porrigere||
tenebitur annuatim custodi duas libras denariorum Wyennensium pro lumine in dicta capella sancte Katherine die noctuque habendo et perpetue procurando. Que omnia et singula dicti fratres abbas et conventus sponte et fideliter promiserunt grata et rata inviolabiliter observare, que et nos ad eorum instanciam et peticionem auctoritate ordinaria et ex certa sciencia favorabiliter aprobavimus et presentibus confirmamus et in testimonialem premissorum evidenciam et memoriam presentes literas nostri sigilli ac prefatorum abbatis et conventus sigillorum apensione duximus roborandas. Actum et datum in nostro dicto monasterio anno domini millesimo CCCLXXXIX, in die sancte Katherine virginis.

Source Fulltext: FUCHS, Göttweig I (=FRA II/51, Wien 1901) S. 725-727