In nomine domini; amen. Anno (1401) indictione IX, pontificatus etc. Bonifacii etc. pape noni anno XII, in mei notarii publici et testium infrascriptorum presencia personaliter constitutus venerabilis in Christo pater ac dominus, dominus Iohannes dei et apostolice sedis gracia monasterii sancte Marie virginis in Gotwico ordinis sancti Benedicti Pataviensis dyocesis abbas mente gravi, consideracione turbida exponens dixit: novit ille, cui omne cor patet, quod universa studia mea, quomodo corde ore et opere reverendo in Christo patri ac domino, domino nostro, domino Georio antistiti Pataviensi placeremus, perfecte coaptavimus usque modo dedique, licet de iure non potuerim, pro quadam pecunie summa sibi successivis temporibus danda pro gracia sua habenda et promocionibus fidelibus suis nobis et nostro monasterio inpensis ac in antea indesinenter inpendendis certas sigillo meo solum firmatas obligatorias litteras, quas omni via modo forma iure, quantum cum deo possumus, voce et animo tamquam per errorem datas expresse revocamus et tenore presentis instrumenti cassamus irritamus et anullamus eo maxime, quia dictus reverendus in Christo pater, dominus episcopus Pataviensis causam, propter quam prefata mea talis, qualis obligacio in medium prodiit, notabiliter infregit: nam ubi nos et nostri monasterii statum promovere tenebatur ut promiserat, ibi impedivit nos, prout hodie in ecclesia nostra parrochiali sancti Stephani in Mautarn auctoritate apostolica nobis incorporata, cuius pacificam vel quatenus tenemus possessionem, inpedit, fratres monasterii et ordinis nostrorum capi fecit, bona dotis dicte ecclesie parrochialis et fratrum predictorum in predam violenter rapi iussit, plurima dampna cum multis scandalis nobis et dicto nostro monasterio inferri publice mandavit et non cessat mandare omnia nobis et prefato monasterio nostro que potest incomoda inferendo, propter que nature legis virtute frangenti fidem etc. ac cessante causa premisse obligacionis cessat et merito effectus eiusdem, super quibus omnibus et singulis premissis prefatus dominus abbas peciit sibi fieri unum vel plura publica instrumenta. Acta sunt hec ad sanctam Margaretham¹ prope Stayn in domo habitacionis plebani illius die XIII mensis septembris hora quasi sexta, anno indiccione et pontificatu quibus supra, presentibus venerabilibus viris domino Petro de Herrczogburg, presbytero Michaele de Ranaw,² Iohanne Veyrtager, Thoma Hochenperrger et compluribus aliis fidedignis testibus ad premissa vocatis pariter ac rogatis. ||
||
(SN.)^a Et ego Nicolaus Stephani de Greysaw,³ clericus Wratislawiensis dyocesis, publicus imperiali auctoritate notarius, qua predicte obligacionis ut dicitur contra ius scriptae et diffinicionis sancti Benedicti et aliorum sanctorum patrum facte revocacioni anullacioni irritacioni et cassacioni ceteris omnibus et singulis, dum sic ut prefatur fierent et agerentur, unacum prenominatis testibus interfui, ea, que sic audivi, in hanc publicam formam propria manu scribendo redegi, signum cum nomine meo solito apposui rogatus et requisitus infra omnium et singulorum premissorum.

Source Fulltext: FUCHS, Göttweig I (=FRA II/52, Wien 1901) S. 7-9