Bonifatius episcopus, servus servorum dei, ad perpetuam rei memoriam. Sincere devocionis affectus, quem dilecti filii abbas Iohannes et conventus monasterii Gottwicensis ordinis sancti Benedicti Pataviensis diocesis ad nos et Romanam gerunt ecclesiam, promeretur, ut illa ipsis favore benivolo concedamus, per que ipsorum et dicti monasterii quieti et tranquillitati salubriter consulatur. Hinc est, quod nos eorundem abbatis et conventus in hac parte supplicacionibus inclinati et certis racionabilibus causis nostrum ad id animum inducentibus ipsos ac prefatum eorum monasterium ipsiusque monasterii membra ecclesias capellas ac loca cum personis degentibus in eisdem presentibus et futuris ac possessiones et loca ad abbatem et conventum ac membra ecclesias et capellas ac loca huiusmodi et ad eorum iurisdictionem legittime pertinentia cum omnibus iuribus et pertinenciis suis, que in presenciarum possident et in futurum procurante domino iustis titulis poterunt adipisci, ab omni iurisdictione dominio superioritate potestate visitatione et correctione episcopi Pataviensis, qui nunc est et pro tempore fuerit, et quorumlibet aliorum iudicum ordinariorum necnon a lege diocesana, eciamsi dictum monasterium per aliquos ex dicti episcopi predecessoribus, episcopis Pataviensibus, qui fuerunt pro tempore, fundatum seu dotatum fuerit, tenore presentium de speciali gracia eximimus et perpetuo liberamus ac sub beati Petri et sedis apostolice ac eiusdem ecclesie Romane proteccione suscipimus atque nostra illaque exempta et libera esse decernimus nobisque et successoribus nostris Romanis pontificibus canonice intrantibus ac dicte sedi volumus immediate subiacere ita, quod episcopus et iudices prefati aut alia quevis persona ecclesiastica vel mundana, quacumque prefulgeat dignitate, in abbatem et conventum monasterium membra ecclesias capellas loca possessiones bona seu personas huiusmodi utpote prorsus exempta non possit excommunicationis suspensionis vel interdicti sentencias promulgare aut alias ratione delicti seu contractus aut rei, qua ageretur in iudicio vel extra, ubicumque committatur delictum vel ineatur contractus aut res ipsa consistat, iurisdiccionem superioritatem potestatem visitacionem aut correctionem aliquam exercere, sed dumtaxat coram dicta sede vel eius legatis teneantur de iusticia respondere non obstantibus, quod inter venerabilem fratrem nostrum Georium episcopum Pataviensem et prefatum Iohannem abbatem, antequam ipse possessiones administracionis bonorum dicti monasterii adipisceretur, de solvendo eidem Georio episcopo per ipsum abbatem Iohannem certam pecuniariam summam tunc expressam in certo termino eciam tunc expresso et de qua sibi in parte satisfecit, ut sibi pro huiusmodi adipiscenda possessione assisteret, quedam pacta conventiones promissiones et obligaciones certarum penarum tunc expressarum adieccione vallata absque tamen sui conventus assensu, que quidem conventiones promissiones et obligationes ac penas in eis adiectas auctoritate predicta harum serie relaxamus et ab illis eundem Iohannem abbatem absolvimus penitus ipsumque ad eorum^a observationem volumus non teneri necnon felicis recordationis Innocencii pape tercii, predecessoris nostri, circa exemptos edita, que incipit: volentes, et aliis constitucionibus apostolicis contrariis quibuscumque. Nos insuper, si episcopus Pataviensis, qui nunc est seu pro tempore fuerit, crisma oleum sanctum et alia sacra ecclesiastica ministrari facere ac monachos seu novicios dicti monasterii ad sacros seu alios ordines promovere recusaverit seu se ad id difficilem reddiderit prefatis abbati et conventui, ut a quocumque maluerint katholico antistite gratiam et communionem eiusdem sedis habente crisma oleum et alia sacra huiusmodi recipiendi ac personas monachos et novicios supradictos per eundem vel alium katholicum antistitem similem gratiam et communionem habentem ad sacros vel alios ordines huiusmodi eciam litteris dimissoriis communiter nunccupatis non petitis seu obtentis promoveri faciendi plenam ac liberam eadem auctoritate licenciam elargimur decernentes omnes et singulos processus et excommunicationes, suspensiones et interdicti sentencias, quos et quas contra presentium litterarum tenorem haberi contigerit seu eciam promulgari, irritos et inanes ac irritum et inane, si secus super hiis^b a quoquam quavis auctoritate scienter vel ignoranter contigerit attemptari. Nulli ergo etc. Datum Rome apud Sanctum Petrum V. idus octobris pontificatus nostri anno duodecimo.

Source Fulltext: FUCHS, Göttweig I (=FRA II/52, Wien 1901) S. 9-11