Bonifatius episcopus, servus servorum dei, dilectis filiis conventui monasterii beate Marie in Gotwico, Romane ecclesie inmediate subiecti, ordinis sancti Benedicti Pataviensis diocesis salutem et apostolicam benedictionem. Inter solicitudines etc. Dudum siquidem quondam Iohanne abbate monasterii vestri regimini eiusdem monasterii presidente nos cupientes eidem monasterio, cum vacaret per apostolice sedis providenciam, utilem et ydoneam presidere personam provisionem ipsius monasterii ordinationi et dispositioni nostre duximus * canonice specialiter reservandam decernentes extunc irritum et inane, si secus super hiis per quoscunque quavis auctoritate scienter vel ignoranter contingeret attemptari. Postmodum vero dicto monasterio per ipsius Iohannis abbatis obitum, qui extra Romanam curiam diem clausit extremum, abbatis regimine destituto nos reservationis et decreti predictorum forsan ignari dilectum filium Petrum abbatem, monachum tunc eiusdem monasterii ordinem ipsum expresse professum et in sacerdotio constitutum in vestrum et dicti monasterii abbatem, licet de facto concorditer elegistis ipseque Petrus abbas reservationis et decreti predictorum similiter inscius eleccioni huiusmodi illius sibi praesentato decreto de facto similiter consensit ac huiusmodi eleccionis negotiuin proponi fecit in consistorio coram nobis. Nos igitur eleccionem huiusmodi et quecunque inde secuta utpote post et contra reservationem et decretum predicta de facto ut premittitur attemptata irrita prout erant et inania reputantes et ad provisionem eiusdem monasterii celerem et felicem, de qua nullus preter nos ea vice disponere potuerat sive poterat reservatione et decreto obsistentibus supradictis, ne longe vacacionis exponeretur incommodis, paternis et solicitis studiis intendentes post deliberationem, quam de preficiendo eidem monasterio personam utilem et ydoneam ac etiam fructuosam cum fratribus nostris habuimus diligentem, demum ad dictum Petrum abbatem, cui de religionis zelo litterarum scientia vite munditia honestate morum spiritualium providentia et temporalium circumspectione ac aliis virtutum donis, quibus personam dicti Petri abbatis earum largitor dominus insignivit, apud nos fide digna testimonia perhibentur, direximus oculos nostre mentis, quibus omnibus necnon vestri conventus ipsum eligentium concordi voluntate attenta meditatione pensatis de persona ipsius Petri abbatis nobis et eisdem fratribus ob dictorum suorum exigentiam meritorum accepta eidem monasterio de dictorum fratrum consilio auctoritate apostolica providimus ipsumque illi prefecimus in abbatem curam et administrationem dicti monasterii sibi in spiritualibus et temporalibus plenarie committendo in illo, qui dat gratias et largitur premia, confidentes quod dirigente domino actus suos idem monasterium per ipsius Petri abbatis circunspectionis industriam et studium fructuosum regetur utiliter et prospere dirigetur grataque in eisdem spiritualibus et temporalibus suscipiet incrementa. Volumus autem, quod solitus monachorum et ministrorum numerus in dicto monasterio nullatenus minuatur. Quocirca discretioni vestre per apostolica scripta mandamus, quatinus eundem Petrum abbatem pro nostra et apostolice sedis reverentia benigne recipientes ac honorifice pertractantes exhibeatis eidem obedientiam et reverentiam debitas et devotas eius salubria monita et mandata suscipiendo, humiliter et efficaciter adinplendo. Alioquin sententiam, quam idem abbas rite tulerit in rebelles, ratam habebimus et faciemus auctore domino usque ad satisfactionem condignam inviolabiliter observari. Datum Rome apud Sanctum Petrum XV. kalendas decembris, pontificatus nostri anno quarto decimo.

Source Fulltext: FUCHS, Göttweig I (=FRA II/52, Wien 1901) S. 24-25