Bonifatius episcopus, servus servorum dei, dilecto filio Petro abbati monasterii sancte Marie in Gotwico Romane ecclesie immediate subiecti, ordinis sancti Benedicti Pataviensis diocesis, salutem et apostolicam benedictionem. Inter solicitudines etc. Dudum siquidem quondam Iohanne abbate monasterii beate Marie in Gotwico, dicte Romane ecclesie immediate subiecti, ordinis sancti Benedicti Pataviensis diocesis regimini eiusdem monasterii presidente nos cupientes eidem monasterio, cum vacaret, per apostolice sedis providenciam utilem et ydoneam presidere personam provisionem ipsius monasterii ordinationi et disposicioni nostre duximus ea vice specialiter reservandum decernentes extunc irritum et inane, si secus super hiis per quoscunque quavis auctoritate scienter vel ignoranter contingeret attemptari. Postmodum vero dicto monasterio per ipsius Iohannis abbatis obitum, qui extra Romanam curiam diem clausit extremum, abbatis regimine destituto dilecti filii, conventus ipsius monasterii, reservationis et decreti predictorum forsan ignari te monachum eiusdem monasterii ordinem ipsum expresse professum et in sacerdocio constitutum in eorum et dicti monasterii abbatem licet de facto concorditer elegerunt tuque reservationis et decreti predictorum similiter inscius eleccioni huiusmodi illius tibi presentato decreto de facto similiter consensisti ac huiusmodi eleccionis negocium proponi fecisti in consistorio coram nobis. Nos igitur electionem huiusmodi et quecunque inde secuta utpote post et contra reservacionem et decretum predicta de facto ut premittitur attemptata irrita prout erant et inania reputantes et ad provisionem eiusdem monasterii celerem et felicem, de qua nullus preter nos hac vice disponere potuit^a sive potest^b reservatione et decreto obsistentibus supradictis, ne longe vacacionis exponeretur^c incommodis, paternis et solicitis studiis intendentes post deliberacionem, quam de preficiendo eidem monasterio personam utilem et ydoneam ac eciam fructuosam cum fratribus nostris habuimus diligentem, demum ad te, cui de religionis zelo litterarum sciencia vite mundicia honestate morum spiritualium providencia et temporalium circunspectione ac aliis virtutum donis, quibus personam tuam earum largitor dominus insignivit, apud nos fide digna testimonia perhibentur, direximus oculos nostre mentis, quibus omnibus necnon dictorum conventus te^a eligencium concordi voluntate attenta meditatione pensatis de persona tua nobis et eisdem fratribus ob dictorum tuorum exigenciam meritorum accepta eidem monasterio de dictorum fratrum consilio auctoritate apostolica providemus teque illi preficimus in abbatem curam et administracionem dicti monasterii tibi in spiritualibus et temporalibus plenarie committendo in illo, qui dat gracias et largitur premia, confidentes quod dirigente domino actus tuos idem monasterium per tue circunspectionis industriam et studium fructuosum regetur utiliter et prospere dirigetur grataque in eisdem spiritualibus et temporalibus suscipiet incrementa. Volumus autem, quod solitus monachorum et ministrorum numerus in eodem monasterio nullatenus minuatur. Quocirca discretioni t[u]e^d per apostolica scripta mandamus, quatinus omnis regiminis dicti monasterii suscipiens reverenter sic te in eius cura solicite prudenter et fideliter exercenda exhibeas studiosum, quod idem monasterium per laudabile diligencie tue Studium gubernatori^b provido^b et fructuoso administratori gaudeat se commissum tuque preter eterne retribucionis premium nostram et dicte sedis benedictionem et graciam exinde uberius consequi merearis. Datum Rome apud Sanctum Petrum XV. kalendas decembris pontificatus nostri anno quarto decimo.

Source Fulltext: FUCHS, Göttweig I (=FRA II/52, Wien 1901) S. 22-23