Cum devotis etc. Uti non ambigimus v. p. constare per reverendum in Christo patrem, dominum nostrum, dominum Leonardum ecclesie Pataviensis presulem pro sinodo episcopali dominica: misericordias domini (April 10), proxime instante celebranda ad Pataviam et paulo post pro die Mercurii (April 13) ex tunc immediate sequente per illustrem principem et dominum, dominum Fridricum ducem Austrie etc. super nonnullis negociis domui Austrie imminentibus nos una cum aliis prelatis ad Wiennam fore evocatos et quod utrique vocacioni propter terminorum vicinitatem et locorum distanciam nequimus comparere. Quare ad v. p. tamquam ad nostrum patrem et directorem singularem recurrimus humilius supplicantes, quatenus ob nostrarum precum respectum prefatum dominum nostrum, dominum episcopum etc. accedere et sue paternitati nomine nostrum supplicare dignemini. quatinus attenta domini principis vocacione nos de comparicione ut premittitur in sinodo Pataviensi facienda dignetur graciose supportare et in casu, quo eadem v. p. dictum dominum nostrum episcopum ad huiusmodi peticionis affirmativam exaudicionem inducere non poterit, hoc nobis significare et pro tunc locum et diem nobis similiter assignare dignemmi, in quibus una vobiscum convenire et quid in ipsa re a nobis omnibus amplectendum erit, tractare valeamus. Scriptum in Gottwico feria tercia post diem pasce anno domini etc. quadragesimo. Thomas abbas in Gottwico, Caspar prepositus ad S. Yppolitum et Vlricus prepositus s. Andree ad S. Andream super Traisam. Reverendo etc. domino Georgio, preposito in Newnburga Claustrali etc.

Source Fulltext: FUCHS, Göttweig II (=FRA II/52, Wien 1901) S. 326-327