Ich Ott von Topell, ich Wigolaus von Volkensdarff, ich Hanns Neydekcher und ich Taman Cholb spruchlêut des erwirdigen geistleichen herren abbt Tamann abbt unser lieben frawn gotzhaus zu Gottweig und des convents daselbs auf ainem tail, ich Jacob Sebekch, ich Jorg Chu^enigsperger von Scho^ennbergk, ich Herman Schad und ich Veit V^eczingêr, yez phleger zu Senftenberg,¹ spruchlêut der erbern weisen . . des richter, des rates und der ganczen gemain baider stet Krembs und Stain auf dem anderm tail bekennen all aynhellichleich umb all anvadrung zuspruch und misshellung, so gewesen sind zwischen den obgenanten baiden taillen und der sy hinder uns obgenant spruchlêut gegangen sind nach laut der hindergengbrief, so wir auf baiden taillen darumb von in haben: von erst von wegen Steffans des Chanczlêr, als der obgenant von Go^ettweig und der convent vermaynet und furbracht habent, wie in die von Krembs denselben irs gotzhaus holden wider landsrecht vorgehalden haben und den sy menigermal haben vadern lassen in den ze antburten etc. Darauf was der von Krembs antburt, wie unser genedigiste herschaft von Osterreich denselben Chanczlêr mit seinem leib und gu^et in iren schermb genummen haben, darauf sy denselben Chanczler nicht schuldig wern zu antburten. Darnach hat der vorgenant von Gottweig den von Krembs zugeschriben im denselben Chanczlêr als sein vorfluchtigen holden noch ze antbu^erten oder im aber den zu einem rechten ze halden. Darauf habent die von Krembs den egenanten Chanczler in gelub genummen solh anvadrung gegen dem von Gottweig vor recht zu ubersten und haben das demselben von Gottweig bey irer erbern potschaft zuemboten im den zu recht ze halden. Uber solh des von Gottweig recht ervadrung und der von Krembs recht erbietung hat derselb von Go^ettweig den Chanczler zu Traisenmaur, als man bey der sammung der landschaft zu Tullen gebesen was, am widerhaymzug in irer potschaft durch sein diener gefangen und gen Gottweig gefurt und in herter venkchnuss gehalden etc. Darauf habent uns die von Krembs furbracht verschreibung genaden und schermbrief von unser genedigisten herschaft von Osterreich, die wir geho^ert und gesehen haben, und auf solh furbringen red und widerred sprechen wir obgenant spruchlêut aynhellichleich, das der vorgenant von Gottweig und sein convent der vorgenanten zwaier stet Krembs und Stain umb solh vorgemelt Verhandlung den richter und den rat zu haws laden und biten schullen zu aynem erbern mal in iren hof gen Stain zwischen hinn und dem nagstkunftigen sant Cholmastag und nach demselben mal desselben tags schullen sy mit sechs edeln lêuten umbsessen, die nicht ir diener sein, die vorgemelten richter und rat baider stet mit vleis biten, das sy in solh vorgemelt verhandlung, so er wider sy getan hab, gutleich pegeben. Das wellen sy und ir gotzhaus mitsambt den frummen lêuten hinfur mit vleis umb sy verdienn. Desgeleichs sullen die sechs in sunderhait die vorgenanten richter und rat auch mit vleis biten solh vorgemelt verhanndlung durch ir di^enst und fudrung willen, dem von Gottweig gutleich ze pegeben. Auch sprechen wir, das diselben von Gottweig den geltbrief, den er hat von Steffan dem Chanczlêr, der do innhaldet vir und zwainczikch phunt phening, dem vorbenanten richter und rat baider stet ubergeben schol, damit sy verhanndlen mugen und sullen, wie sy verlust, und sullen auch die pargen darunder sich der Chanczler darumb verschriben hat, gantz ledig sein. Dann von ains briefs wegen, den die von Go^ettweig habent von weylnt dem richter zu Krembs und der stat zu Stain, darinn begriffen ist, das ein yeder abbt von Go^ettweig in irem hof zu Stain zwainzikch fuder wein ze ayncziger phenbertweis verkauffen schull nach innhaldung desselben briefs, darinn auch begriffen ist, das derselb von Gottweig, ob notdurft beschech, zu besterkchung an der statmaur mitleyden haben sullen als ander burger von seinem haws. Darauf habent die von Stain furbracht, wie in auf solh zurichttung der maur ain merkleiche sumb gelts gegangen sey, darumb in von den abbten unczher chain hilf noch mitleyden beschehn sey und sy sich des doch albeg gebilligt habent, und habent darauf begert an den gegenburtigen herrn abt Taman von Go^ettweig solh ir vadrung ausczerichten und zu beczallen. Darauf sprechen wir, das der vorgenant von Gottweig und der convent der vorgenant stat zu Stain umb solh zurichten und vadrung ausrichten und an iren willen komen sullen von den jaren, so lange er abbt gebesen ist, nach begreiffung des vorgemelten briefs alles ungeverleich. Was aber solher vadrung bey sein vorfadern versessen ist, des sprechen wir in in unserm spruch gancz ab. Item von wegen des turn, den abt Peter guter gedêchtnu^ess in der statrinkchmaur und seinem hof zu Stain gelegen hat abprechen lassen, darumb derselb abt, auch abt Lucas sein nachko^emer und der gegenburtig herr abt Taman sich verbilligt habent denselben tu^ern den von Stain wider aufczepawn, des nicht beschehen ist. Darauf sprechen wir das der vorgenant abt Taman denselben tu^ern mit sein werchlêuten nach rat aines haubtman oder phleger baider stet Krembs und Stain mit gemêwr und zimmer ycz wider pawen sull zu der wer nach notdurfft ungeverleich. Item umb den artikell des geberbs weins und getraids, darumb der obgenant abt und die stet stossig sind, denselben artikell des geberbs umb wein und traid legen und schieben wir obgenant spruchlêut fur unser genedigiste herschaft und lanndsfu^ersten, daselbs dann bald tail darumb sullen entschaiden werden. Item umb den artikell des verpots der holden, darinn die von den steten nicht anhellig sind, darumb sprechen wir, das ain tail dem andern hinfur nyemant verpieten schol on klag und ze red seczen irer richter und anbellt. Dann umb all ander handlung und zwitrêcht nach laut der hindergengbrief, so wir von baiden taillen darumb haben, sullen sy gancz verricht und geaynt sein ausgenummen den artikel des geberbs, der stee in mass, als ycz vorgemelt ist. Auch sprechen wir, welher tail dem gegenburtigen unserm spruch nicht nachchem, noch stêt hield in aynem oder menigern artikellen, das wissentleich gemacht wurd, der wêr in den obgemelten sachen seinem widertail aller seiner gerechtikait und zuspruch verfallen und unser genedigisten herschaft und lanndsfursten tausent gulden und yedem spruchmann hundert gulden alles an alle genad und nachlassen. Und des geben wir obgenant spruchleut yedem tail ain spruchbrief in gleicher laut bebart mit unserm anhangunden insigellen. Ausgenummen hab ich obgenanter Ott von Topel dieczeit mein sigill bey mir nicht gehabt, darum hab ich vleissichleich gebeten mein lieben bruder hern Wilhalm von Topell, das er die sach mit seinem anhangundem insigell bestêtt hat im an schaden, darunder ich mich verpind treuleich und ungeverleich. Geschehen zu Stain nach Christi geburd virczehen hundert und in dem dreu und virczigistem jare an mitichen nach unser lieben frawn tag nativitatis.

Source Fulltext: FUCHS, Göttweig II (=FRA II/52, Wien 1901) S. 377-380