Wir Fridreich etc. bekennen, daz wir haben angesehen die fru^emkait und erberkait des erbern unsers liben andechtigen Hannsen von Rosenaw, pfarrer zu Chu^elb, und haben in dadurch und von sundern gnaden zu unserm caplan und in und die yetzgemelt sein kirchen mit iren lewten und gu^etern in unser sunder gnad und scherm genomen und nemen auch wissentlich mit dem brief und mainen und wellen, daz der pfarrer nu furbasser alle die recht freihait gnad und gut gewonheit haben und der genyessen sol und mag, der ander unser capla^en untzher gwondlich genossen haben oder noch hinfu^er genyessen und gewynnen werden ungeverlich. Wir tu^en auch dem benanten pfarrer dise sunder gnad in crafft des briefs, daz er all sein gu^et, daz er yetz hat oder hinfu^er gewynnet durch seiner seelhail willen schaffen machen geben oder ordnen mag kirchen gotshêwsern clo^estern armen lewten seinen frewnden oder andern, wem in verlustet und fu^eglich beduncket, an menigklich irrung und hindernuss auch ungeverlich. Davon gebieten wir etc. Geben zu der Newnstat an sand Johannstag decollacionis nach Christi gepurte im viertzehenhunderten und drey und viertzigisten jar, unsers reichs im vierden jare.

Source Fulltext: FUCHS, Göttweig II (=FRA II/52, Wien 1901) S. 376-377