Wir Friderich etc. bekennen etc. das fur uns komen ist unser und des reichs lieber getreuer Hanns Greyff und hat uns demu^etticlichen gebetten, das wir im dise hienach geschriben kleinat und wa^eppen, nemlich ein blawen schilde, dorinne ein weyszer greÿff mit zerspannen clawen und fu^essen und aufgereckten flugen, item einen helm mit einer blawen und weyszen helmdecken und darauf ein halber weyszer greÿff ouch mit zerspannen clawen und auffgereckten flugen, alsdann die in mitten dises briefs von varwen eigentlicher uszgestrichen und gemalet sein, die sin vordern und er, als er uns ha^et zu erkennen geben, biszher gehabt und gebraucht haben, zu bestetigen und die von newem zu verleihen gnediclich geruchten. Des haben wir angesehen desselben Hanns Greÿffen demu^ettige bette sein vernunft und redlicheit auch die getreuen dienste, die er uns und dem reich getan hat und hinfur zu tun willig ist und sein sol, darumb mit wolbedachtem můt und rechter wissen so haben wir im dieselben kleinet und Wappen bestetigt, ouch im und seinen eelichen erben die von newem verlihen, bestetigen und verleihen in die also von newem mit disem brieve und meinen und wo^ellen, das si der nu furbaszhin in allen redelichen sachen zu schimpf und zu ernst gebrauchen sollen und mo^egen von allermeniclichen ungehindert. Und wir gebietten dorumb allen etc., in was wirdikeit wesens und sta^ets die sein, ernstlich und vesticlich, das si den vorgenanten Hanns Greÿffen und sein eelich erben solicher kleinat und wa^eppen also gebrauchen la^eszen und si doran nit hindern noch irren in dhein weise, als si alle und ein ieglicher unser ungna^ed wo^ellen vermeiden doch andern, die desgleichen wa^eppen und kleinat ouch fůrten, an iren rechten unschedlich mit urkund disz briefs versigelt mit unserm kuniglichen anhangenden insigel. Geben zu der Neuwenstatt nach Crists geburt vierczehenhundert und im vierundviertzigistem ja^er an sant V^elreichs des bischofs tag. unsers reichs im fu^enfften jare.

Source Fulltext: FUCHS, Göttweig II (=FRA II/52, Wien 1901) S. 388-389