Wir Fridreich etc. bekennen, als unser getrewer Jo^erg Sinczendorffer gesessen zum Wasen¹ unsern getrewen Sigmunden und Lienharten gepru^edern den Sinczendorffern seinen vettern unter anderm ettleiche stukh und gu^eter unser und unsers fu^erstentums O^esterreich lehenschaft gefu^egt und gemacht hat nach innhalttung des gemêchtbriefs darumb ausgegangen und uns fleissicleich gepeten dasselb gemêcht gnêdicleich zu^e bestêtten, daz wir als herre lanndesfurst und vormund unsers lieben vettern kunig Lasslawes, den wir innhaben, getan und zu^e solhem gemêcht unsern willen und gunst gegeben und das bestett haben wissentleich mit dem brief, was wir zu^e recht daran bestêtten sullen oder mu^egen, daz die obgenanten Sigmund und Lienhart gepru^eder die Sinczendorffer und ir erben dieselben stukh und gu^eter, ob es ze schulden kumbt, nach innhalt des obberu^erten gemêchtbriefs in gemêchtsweis innhaben nuczen und niessen sullen und mugen, als solichs gemêchts, lehens und lannds recht ist, doch uns, den benanten unserm lieben vettern kunig Lasslawn und seinen erben an der lehenschaft unvergriffen angevêrd mit urkund des briefs. Geben zu Wienn an montag nach sand Luceintag² nach Kristi gepurd vierczehenhundert jar und darnach in dem fu^emfundvierczigisten jar, unsers reichs im sechsten jar.

Source Fulltext: FUCHS, Göttweig II (=FRA II/52, Wien 1901) S. 396