Ich Leonhart Lasperger bekenn und tun kund offenlich mit dem brief, das ich mich verpficht^a hab in den dienst des erwirdigen herrn, herrn Wolfgangs abbt zu Gottweig und des convents daselbs in solcher mainung, das ich in das gericht des obgenanten gotzhaus zu Gottweig getrewlichen nach dem pessten, so ich versten, verwesen und ausrichten sol und des goczhaus armlewt und hindersassen verantburten guetlichen halten und die nicht ungewondlichen besweren sol ungeverlich. Und darczu sol ich haben drew pferd und frumer knecht zwen. Da entgegen hat mich sein genad versprochen fu^er sich und das convent zu geben auf yedes pferd acht pfunnd pfening und das gewondlich hoffuetter. Auch sullen sŷ mir geben den drittail aus allen wa^endeln, dieselben sol ich trewlich aufschreyben und inbringen und die abpruch derselbigen wandel su^ellen beschehen mit meins obgenanten herren oder seines anbalts wissen. Sy habent mir auch vergunngen mein hawsfrawn in dem zehenthof ze Fuert ze halten und dahin zu geben versprochen ain dreÿling wein ungeverlich von dem zehent, so in denselbigen hof genumen wirdet, und anderthalb mu^et korn und anderthalb mut habern, auch den krawtzehent zu Palld, auch ain fueder hew^e, ain fu^eeder grumat und sol haben vier kue. Die sullen ungeverlich mit meines herrn viech im hof essen. sŷ sullen mir auch geben prennholcz, was ich des ungeverlich zu notturft bedarf, das sol ich selber fu^eren. Auch wan ich oder mein knecht in des goczhaus oder der armenlewt notturfft reyt, dieselben zerung, so ich oder mein knecht tun, soll mein herr beczallen. Wan auch mein herr oder sein anbelt meine pferd und knecht nuczen wellen in irer notturft, des sullen sŷ gewalt haben und ich in nicht widersein. Auch ob ich ain oder zwen knecht aufnem, dew solche unpilliche unfu^eer beginnen, die im gotzhaus nit teuglich waren, darinnen habent sŷ gewalt mit mir zu schaffen, dieselben zu verkeren. Auch ist beredt, das sy mich an redliche ursach nach dato des briefs in drein jaren mit dem dienst nicht verkern sullen, an alain ich handlet solhe ungewondliche sach wider sew, darumb es in dann muglich ze thun wa^er, so sol ich des drum nicht wider sein. Ich hab mich auch des dienst underwunden des nachsten freytag nach sand Margretentag (Juli 15) des XLVI. jar. Des zu urkund gib ich dem obgenanten meinem gena^edigen herrn abbt Wolfgangen und dem convent dy beret zedel und^b meines obgenanten Leonharten Lasperger aufgedruckten innsigel. Geben an freytag nach sand Margrettentag anno domini XLVI. jar.

Source Fulltext: FUCHS, Göttweig II (=FRA II/52, Wien 1901) S. 399-400