Anno domini etc. LVII feria quarta post omnium sanctorum ist komen fur meins hern gnad abbt Mertten Gorig Paungartner mit ainem petbrieff von Christan und Hannsen gepruederndern Paungartnern ausgegangen und hat daselbs begert nach innehalt desselben petbrieff lechnnschafft der guetter, so Hanns Paungartner mit tod hinder im lassen hat. Darauf ist im von meinem hern geantburt, wie etbevill purkrecht und dinst auf denselben guettern ze beczallen ausstenndt, so die enttricht werden und sich auch erfrag, wie es umb den hoff ze Ekchnndorff und ander sein guetter stee, so well er gern verrer darin hanndln nach ainem pillichem und dazwischen sol solh lehnnschaft ungeverlich an schaden anstenn. Darauf hat der benant Paungartner begert im ze geben in geschrifft den ausstanndt solicher dinst und purkrecht. So das bescechen ist, hat er solich ausstanndt, die sich des LVII. iars begeben habent, versprochen ganntzlich ze betzallen auf Katherine nagstkunfftig und die ubermass von allen andern vergangen iaren auf invocavit nagstkomundt in anno LVIII, presentibus domino Vlrico pro tunc cellerario, fratre Ludowico pro tunc magistro pistrine, Tiboldo Pimisser, Petro Frannkch, Wolfganngo Fra^ell magistro curie in Kunigsteten. Actum anno et die quibus supra. 

Original dating clause: feria quarta post omnium sanctorum

Language: Deutsch