Die gemain zu Napperstorf hat in gegnburtikait Waltesar, Hanns des Haugen ytzo richter daselbst su^en, anpracht, wie derselbe richter menig veintschaft und unwillen von hern Jorigen Rasennhart¹ auch andern hab, dadurich eur gnad darzue sy mit irm leib und gut in verrer scha^eden gebracht mochten werden, wan er noch die vierer in irn notturften nicht handeln, als sy schuldig sein und von alter herkomen ist, und gehorsamleich gebeten haben, das eur gnad ain andern richter und vierer geseczt hiet, darauf in zu Wulderstorf geantburt ist, sy sullen solh geprechen und fursarig dem richter furhalden und freuntlich fragen, ob er lennger bei dem gericht und zehnnt beleiben well, dawider wolten sy irn halben nichts hanndeln. Wolt er aber nicht dabei beleiben, alsdann ain andern fugleichen erbern an sein stat aus in aintra^echttigkleich ze erwellen bevolhen haben, darauf er in gegenburtigkait des ganczen gemain auch seines obenanten su^en geantburt hat, er well des gerichts noch des zehnnts furbaser nicht haben und in des ledig ze sagen offennlich durich gots willen gebeten hat, auf das die gemain ainhelligkleich Wolfgangen Hierss daselbs zu Napperstorf gesessen zu ainem ku^enftigem richter mit eurn genaden willen ze haben und in den durich eur schreiben ze bestatten diemu^ettigkleich gebeten, auch darauf den getraidzehnnt bestannden hat. 

Language: Deutsch

Notes: