Wir Mert von gottes genaden abbt unser frawen gotzhaws zu Gott(weig) bekennen fu^er uns und unser convent daselbs, das wir an hewtigen tag geben des briefs den edeln Jorg Smidel zu unsern und unsers benanten gotzhaus notturfften und diensten mit drein pferden und zwain gueten knechten damit stat hie oben oder von haws ze dienn auf ain gancz jar aufgenomen haben in solcher beschaidenhait; das er uns mit sein selbs leib, darczu mit seinen knechten und pferden auf all unser vordrung alls ander unsers gotzhaus dienner an widerred gehorsam gancz trew und gewertig seÿ. Daentgegen wir denselben Smidl geben sullen und wellen von erst fu^er in unsern gewondlichen junckheren und fu^er sein knecht den schuczentisch in der turnŷtz dabeÿ zu jarsold auf sich sein oberu^ert anczal der knecht und pferd^a lb. d. damit notturft und fueter auf dŷeselben pferd, alls solchs an nagel und eÿsen gemainklich andern unsers goczhaus diennern vormalln geben worden ist und noch geben wirt und nicht mer, und ob der egenant Smidel, sein dienner mit einander oder ir ainer in der jarfrist icht zu uns, unserm vorbenanten goczhaus seinen diennern lewten oder guettern vordrang und ze sprechen gewungen, wie sich das fueget, gar nichtz ausgenomen, das dann solch vodrung und spruch nyndert anderswo hin sunder allain an unser ellter dienner getragen und von dem darauf an all ir ausczug und weÿtter waigrung darumb genczlich entschaidt und bericht werden, ob sŷ oder ir ainer u^eber das allso uber das, so yeczo bemelt ist, solch vordrung oder zuspruch er dann, die an des egenanten goczhaws dienner gebracht und darumb entschaiden wurden oder nach anbringen und berichtung derselben mit klag oder fu^erwendtung andern endten hin, wo das wa^er, bringen oder aber solchen bericht nicht sta^et behalten wurden, wie sich das bega^eb oder fueget, das dann solchs gancz kraftlos damit uns unserm egemelten gotzhaus seinen diennern lewtten und guettern und manigklichen von irn wegen an allen schaden sey gancz trewlich und ungevarlich mit urkundt unsers aufgedruckten insigil. Geben an^b

Source Fulltext: FUCHS, Göttweig II (=FRA II/52, Wien 1901) S. 593-594