Unser gebet etc. Edler, sunder lieber Ha^eckinger! Uns hat anbracht brueder Leonhart pfarrer unser pfarr zu Gottweig, wie ir vermaint, das alain der von Hohenberg als ein vogt uber etlich lewt in der Waldmairch zw Sand Veit und daselbs umb gewalt hab stewr anczeslahen und nicht wir, lassen wir ew wissen, das spruch auch ander brief, wie mit der vogteÿ und stewr gehalten sol wern, vorhanden sein, die aufweysent klarlich, das der von Hohenberg uber etliche gueter, daruber er vogt ist, alain in die rais sol und mag ein beschaiden anslag machen, dabey unser anbalt auch sein sol, aber ander stewr anzeslahen zw notturft unsers goczhaus und gescheft eines landsfursten sein uns nicht abgesprochen, sunder darin gewalt haben ansleg zu machen als auf ander unsers gotzhaws holden, des ir ew wol mogt erkunden an den briefen, die ewr herr hat, und trawen ew, ir machet uns in den brieffen und ansleg kain irrung, wen uns unser armenlewten grosser schad daran mocht entspringen. Geben zw Gott(weig) etc.

Source Fulltext: FUCHS, Göttweig II (=FRA II/52, Wien 1901) S. 596