Edler, besunder lieber Neidegker! etc. Uns ist anbracht, wie die ewren von unsers goczhaws lêwtten der herschafft Nider Ra^ena aufslag von iren wein haben und nemen wellen und in darumb yeczo etlich wein verpoten und dieselben die unsern darauf von in ausgeporgt haben, bitten wir euch in besundern andachtigem vleis pein den ewren darob zu sein, damit sy die unsern solcher aufsleg und annder vodrung begeben, auch ir verpot gegen in und iren guetern getan guettigklich ganncz abtun und euch die, auch ander unser armlewt, so die in iren nottu^erften an euch oder die ewren langen, frewntlich bevolchen haben. Das etc. Eur verschribne anttwurt last uns pey dem potten wissen. Geben zum Gottweig an erichtag vor sand Symanstag anno domini etc. LXIIII. Mert von gocz gnaden abbt zu Gottweig. Adresse: Dem edln vesten Ruelanndt Neidegker von Ra^ena etc.

Source Fulltext: FUCHS, Göttweig II (=FRA II/52, Wien 1901) S. 617-618