Wir Hawg grave zu Werdenberg und zum Heiligenperg unsers allergnedigisten herrn . . des Ro^emischen kaiser etc. obrister haubtman und annder sein k. g. ra^ette und lanndlew^et in Osterreich, die von seiner k. g. und gemainer lanndtschafft zu den sachen der nagstgehallden lanndttêg zu Krembs und Wienn¹ geben sein, embieten den erwirdigen ersamen edlen strenngen und vessten allen und ieglichen den von prela^etten von herrn und der ritterschafft in dem viertail ob des Wiennerwalds, den der gegenburtig unnser brief getzaigt oder furbracht wirdet, unnser dinst gru^esz und gutten willen bevor. Als man auf dem nagstgehallden lanndttag hie zu Wienn² unnder annderm ain uberslachen und raittung alles innemens und auszgebens, auch aller schuld, die man noch betzallen soll, getan und sich daselbs in raittung erfunden hat, das solh schuld, der man ain merern tail auf weinnachten und sannd Jorgentag nagstkhunfftigen ze enttrichten verschriben. merklich und grosz ist. Nachdem aber das der anslag der lanndstewr, auch der aufslag so ku^erczlich nicht ertragen mu^egen, solhs angesehen hat sich die lanndtschafft daselbs verwilligt, das ain ÿeder den vierden tail aller seiner nu^ecz und gu^ellt geben und den dritten tail desselben vierden tails auf die ÿeczkhunfftigen weinnachten (1478 Dec. 25) und den anndern tail allen zwischen hie inn und sannd Jorgentag (1478 Dec. 25-1479 April 24) auch schirist chomend her anttburtten und raichen su^elle und welle. Weiher auch das nicht tu^en. den soll man darzu bringen, als sich auf ain ungehorsamen ze tu^en gepu^ert. Das verku^enden wir ew^e hiemit, das ir solhe verwilligung von seiner k. g. und gemainer lanndtschafft wegen auf die bemellt zeit nachzegeen wisset und darinn nicht vercziehen tu^et, dadurch man die obbestŷmbten betzallung enttrichten und lanndt und lew^et und ew^e selbs in frid und gemach behallten mu^eg. Daran etc. Geben zu Wienn an sambstag nach unnser lieben frawen tag concepcionis anno domini etc. LXXVIII.

Source Fulltext: FUCHS, Göttweig III (=FRA II/55, Wien 1902) S. 127-128