Wir Fridreich etc. embieten unnsern getrewen . . unnsern erb und vogtlewtten gemaÿniklich zu unnsern geslosz Tiernstain gehorund, den der brief getzaigt oder verkhundet wirdet, unnser gnad und alles gu^ett. Wir haben unnserm getrewen Bernhartten Karlinger, unnserm mautter zu Stain, die vogtrecht vogthabern dienst und annders. was uns der von verganngner zeit bisher auf ew^e aussteet, von unnsern wegen von ew intzebringen bevolhen. Emphelhen wir ew^e allen und ewer ÿedem besunder ernstlich und wellen, das ir dem benannten Karlinger solh vogtrecht und dinst, was uns der also bisher auf ew^e unbetzallet aussteen, furderlich raichet und gebet und darinn nicht annders thu^et. Welich aber aus ew sich der ze geben setzen wurden, haben wir bevolhen darumb aufzehallden und ze phenntten. Das etc. Geben zu Grêtz an freitag vor sannd Antonientag anno domini etc. LXXVIIII, unnsers kaisertumbs im XXVII. jare.

Source Fulltext: FUCHS, Göttweig III (=FRA II/55, Wien 1902) S. 128