In dem namen des herren; amen. Von desselben geburt tawsent vierhundert und im achtzigisten jare der dreyzehenden indicion an suntag des zwelfften tags des monads marcii, pabstumb des allerheiligisten in got vaters und unnsers herren, herrn Sixten von gottlicher fursichtickeit pabst des vierden seins new^enden jars von wegen des erwirdigen capitels des stiffts Passaw dazumal capitelsweis versamnet, ain capitel machend und bedewttend ein haubtsacher in der hieneben geschriben appellation offnem instrument zuvordrist benennt, rechtlich ersu^eecht ich Erasm Wu^eerer von kaiserlichem gewallt offenbarer notari hie unden geschriben in mu^eet und willen der hindergeschriben appellation offen instrument zu verkunden wissenlich zu machen und zu ero^effnen, auch allen und ÿeden, die solh sach antrifft, beru^eren wirdet oder in ainicher weise kunfftiklich beru^eren mag, unzweiffenlichs wissen zu bringen an die portten der thumkirchen zu Passaw angeslagen hab, auch das untter dem hochen ambt der mess und anndern heiligen tagzeitten steen hab lassen also, das es von den furgeenden hat mu^egen gesehen und gelesen werden. Nach vollbringung solher heiliger ambt han ich dieselben instrument von dannen wider abgenomen und daran abschrifft durch mich vleissigkich verhort und collationirt gelassen. Das ist geschehen in und beÿ der kirchtu^er zu Passaw in gegenburtigkeit der ersamen und fursichtigen mannen herrn Erharden Leb vicarien, Georgen Rawber, Johannsen Perger, oblaÿer des chors des stiffts Passaw, Hannsen Ma^essinger und Hannssen Prenner briester und geweichten Passawer und Regenspurger und Freisinger bistumben, getzewgen zu den vorgeschriben sachen erbeten. Darnach aber des jars indicion monads und pabstumbs als vor steet an sambstag dem funffundzwaintzigisten tag des monads marcii, der do was der tag unser lieben frawen verkundung, han ich Erasm Wu^eerer offenbarer notari hie oben und undten geschriben in vorbestŷmbten namen der hindter geschriben appellation offen instrument in mu^eet und willen zu verkunden und zu aller und ÿeglicher vorgeschribner wissen zu bringen in der pessern weise und form, so ich mocht und sollt, den to^eren und portten des ertzbistumbs kirchen zu Saltzburg offennlich angeslagen steen lassen, also das es gleÿcher weis von den furgeenden gesehen und gelesen werden mo^echt, und als dieselben geendt waren, solh offen instrument von den benannten to^eren wider abgenomen, auch abschrifft durch mich verhort und gepu^erlich collationirt daselbs gelassen zu merer urkund solher verkundung und Offenbarung, das alles und ÿedes ich vor den zewgen hie oben und unden geschriben offenlich betzewgt han, uber das alles und ieglichs der vorgenannt herr Valentin dechant fur sich selbs und in der vorberu^ertten namen im von mir undten geschriben notarien ains oder mer offenbarer oder offenbare instrument zu machen und zu geben pat. Das ist geschehen in und bei der ertzbischoflichen kirchen des jars indicion tag monad pabstumb und statt als vor steet in gegenburtigkeit der erbirdigen und ersamen man herrn Burkhard,¹ der freÿen kunst und ertzneÿ doctor und des erbirdigisten in got vaters und herrn herrn Burckhard, der heiligen kirchen zu Salczburg erczbischof und des stuls zu Rom legaten, artzt Johannes Hêsel, licenciat geistlicher recht, Johanns Swartz, Johanns Reicher, capplan hern Pilgrims capellen in der vorbestimbten kirchen gelegen, Mathewsen Vetzinger, korherren unser frawen kirchen zu Nidernburg in der statt Passaw, und Hainrichen Phaffenhofer, offenbaren notarien, geweichten Salczburger und Passawer bistumben, getzewgen in den vorgeschriben gebetten und sunderlich ervordert. Nichts desst mŷnder hat der benannt hochwirdigist herr cardinal, aus was geists waiss man nicht, in solher unnsrer hangunden appellation und an rechtlich erkanntnus der sachen durch manigerlai list und erworben, geu^ebt oder bestellt gunst sich understannden in das geistlich und welltlich regiment, auch des stiffts herrschaft, hab und gutter einzudringen und ee er uns mit seinen vermaintten bullen und ermonungbrieffen rechtlich ersuecht, zuerst unserm official zu Wienn lassen ersuechen oder requiriren unsern und unsers stiffts Passaw gerichtszwang daselbs zu betru^eben, auch denselben official in anstannd seiner rechtlichen appellation unenttschiden hangend zu schma^eche uns und den stifft auf das ho^echst peswa^ert, als er dann denselben zu peswa^eren und in unrecht zuzefuegen noch nicht ablêsst, sich auch an erkanntnu^ess der sachen fur einen bischof zu Passaw beruffen und verkunden lassen, daraus wir klêrlich erkennen, das der benannt cardinal sein gewaltsam und unrechtlich durstickhait sta^ettigs u^eben, beschwa^erung beschwa^erungen zufuegen und sein vermaint recht on all rechtlich ordnung mit der tat volfuren will, in unnser und des stiffts Passaw gerechtickeit, auch desselben undertan ho^echste verletzung und peschwarung, darumb wir an erichtag dem newntzehenden tag des monats September von solhen peschwa^erungen uns ÿetz also beschehen und so hinfur beschehen mochten oder der wir uns aus warlicher antzeigung zu geschehen fu^erchten fur unnsern allerheiligisten vatter, den pabst ettlicher mass und weis, als das instrument der appellation daruber gemacht lewttrer innhellt, geappelliert und uns beru^eeffet haben und dieselben, als die ordnung des rechtens ervordert, verkundet auch annders getan, das wir darinn und dabei von rechts wegen tuen sollten, solhs wir auch hiemit vernewen und gnu^egsamlich begriffen und ausgesprochen haben wollen in maÿnung der zu geprawchen und uns damit zu beschirmen, des wir uns abermals offennlich betzewgen, des alles unverhindert und wiewol der erwirdigist herr cardinal mit uns frewntlich und guttlich ta^eg und ha^enndel zu berichtung der sach gehallten und beÿ gelawben ains cardinals dem wirdigen und ersamen unserm lieben choorbruder und bottschafft herren Wigeleis Fro^eschl auch durch sein geschrifft versprochen hat zwischen und in mittler zeit solher berichtung nichts wellen vernewen oder in krafft seins vermaintten rechtens mit der tat furzenemen, das wir doch widerwerttig erfunden haben, wann derselb herr cardinal ettlich sein diener in die statt Passaw geschickt, den erwirdigen vatter und herren erwellten zuerst und darnach auch den erbirdigen vatter herren Albrechten, bischof zu Salon suffraganien, auch den wirdigen und ersamen herren Sigmunden Vorsthofer, gemainen official des hofs zu Passaw, in krafft seiner vermaintten monungbrief, der grund doch durch unnser rechtlich und gegru^endet appellation als vorstet langst angestellt worden ist, das der erwellt seins rechtens absteen und der suffragani sein bischofflich ambt hinfur, auch der official der^a gerichtszwang nicht zu u^eben ervordert und ermant hat, auch auf sein ersuechen beÿ der keiserlichen maiestat gemacht, das sein maiestat all und ieglich fru^echt gu^ellt und rennt dem stifft und unnserm capitel zugehorund verbotten, als auch geschehen ist, uns durch die obern macht gewallt und gewaltsamkait also anzulegen verfu^egt und bestellt und solhs ubels nicht gesta^etigt, ettlich getraid und korn dem stifft Passaw zusteend in der stat Wienn auf einen kassten ligend die tu^er des kasstens aufgebrochen und solh getraid gewaltiklich mit der tat enttwert und hinzutragen geschafft, und im selbs aussherhalb erkanntnu^es des rechtens zugeaigent. Darnach hat er den benannten herrn Wigleusen mit dem vorberu^ertten seinen monungbriefen ervordern lassen, das er unnser sachen zu u^eben abstee und uns alle des rechtens und erber were und behelff wellen nemen. Dazu hat er gedroet, als wir aus warlicher sach erlernet haben, mit krieg und waffen, auch vergiessung menschlichs blu^ets in die gwere des stiffts Passaw einzugeen villeicht rechtlichen austrag gen uns ze nemen furchtend und das swa^erer ist, sich mit seinen ha^enndln einen veint der kirchen êrzaigt, die briesterschaft und gewissen der menschen sich understeet zu betru^eben, auf das er seinen aigen nu^etz on erkanntnu^es unserr rechtlichen appellation erlannge, im auch den gewalt des regiments zuaignet, die herrschafft der kirchen als ein veint angreifft, auch iren schaden und verderben schaffet, rawber betzwinger und das bo^eser ist, ketzer und der kirchen beschediger geworben bestellt und haimlich on all rechtlich entsagung und pewarung sich understeet durch sich selbs und die seinen mit auffru^er die schloss der kirchen Passau zu uberchomen. als er im dann ÿetzt ettlich herrschafft, pfaffhait und das volk ettlicher massen seinem gepiet veinttlich und mit der tat underworffen hat, doch albeg mit vorbehaltnu^es der schma^echwort oder iniurien zureden. Und wiewol er nu^e in der statt Stain² ettlich ervordrung und manung zedel in krafft seiner vermaintten bullen hat lassen anslahen, als wir aus gemainer sag vernemen, davon wir auch appelliert haben, das wir sein erwirdickeit fur einen bischof und hirtten unserr seelen erkennen haltten und haben, auch sein hailbarlich ermanung annemen sollten etc., des wir uns seer verbundern, dann was sorg mo^echt er unnseren seelen mittailen oder was hailbarer ermonung mochten wir von im emphahen, der uns gewaltsamlich unrecht von dem stifft auffru^eer machen tu^et, auch unserr und des stiffts undertan plu^eet begert und zu vergiessen schafft, der seins vermaintten rechtens und der sachen unnser appellation vor unnserm allerheiligisten vatter dem babst mit recht in freÿem widersprechen den khain ausstrag leiden tat. Ob das ainem so grossen prelatten der heiligen christenlichen kirchen gezŷmme, setzen wir zu annder erkanntnu^ess und ob yemands vom widertail mit unnu^etzer red zu ratten vermaint aus ertzellten furgelegten ursachen in unnserr apellation die fursehung des benanntten herrn cardinals nicht genu^egsamlich angefochten, auch wider den vertrag oder compactat dewttscher nation nicht sein, welicher vertrag untter annderm ein solh clausel und geding innhellt. Es bedeucht dann unnsern heiligisten herrn aus lawtter oder redlich ursach einen nu^etzern und wirdigern zu fu^ersehen hab, damit seÿ dem vertrag der dewtschen nation nichts abgenomen, dann wir bekennen solhen vertrag dise wort inhallten. Wir verhoffen aber, das kain lawtter noch redlich ursach wider unnsern erwellten erfunden werd. Und ob ichts durch die widersacher solhermass dawider pegegnet, das gescha^ech doch nicht lawtter, das ist mit erkanntnuss der sachen, wann dise fursehung unser und unnsers procurator unervordert, noch, als recht ist, verhort geschehen ist. Darzu geben die heiligen geistlichen recht genu^egsamlich zu erkennen, wie der nutz und solh wirdigkeit sulle verstannden werden, das es mere dem regiment dann der person zugepu^ert, darumb die heiligen vatter gesetzt haben, das den wolverdienntten in iren kirchen die fro^embden und ausswendigen zu ausschaidung der, die der purger und irer undertan gut getzewgnu^ess verdiennt haben, furgesetzt, auch der briesterschafft wider iren willen kain fro^embder bischof gegeben werd, es mocht dann aus der statt priestern kain wirdiger erfunden werden, als dann sind die zu verwerffen das die fro^embden billich furgesetzt werden, als betzewgt Celestinus der babst, der auch darnach spricht: ein ieglicher verdient die frucht seiner ritterschafft in der kirchen, darinn er all sein tag die ambt volbracht hat. Es soll sich auch kain annder in frombden sold pegeben oder ains anndern gepu^erlichen lone im zuaignen, darumb die briester macht haben sullen zu widersteen, und so sŷ sehen sich zu peswa^eren und in ÿemand uber zwerch eindringen, sich nicht furchten den zu verachten, daraus offennlich zu versteen, das die fursehung und besta^ettigung dem benanntten cardinal beschehen und was daraus volgt, nicht allain wider die heiligen geistlichen recht, sunnder auch dem vertrag der dewtschen nation widerwertig ist. Das aber unnser allerheiligister herr unserr kirchen oder stifft Passaw nicht nu^etzlich fu^ersehen hab mit der person des cardinals, mag mit der tat pebeist werden, wann der herr cardinal nicht aus disem lannd geboren, wiewol er ein dewtscher ist, auch in noch beÿ dem stifft Passaw und seinen herrschefften kainer gestifften oder nahendgewontten frewnd beÿstannd hat, mit der hilff er zu zeitten dem stifft Passaw in seinen widerberttigkeitten verhelffen mo^echt, auch nicht aus der schoss schar oder capitel der kirchen, das er des regiments ainich wissen haben mo^echt, was ubels daraus volgen, mag offennlich erkannt werden. Darzu hat der belaidigt stifft Passaw lanngst von gehorsam wegen pa^ebstlicher und kaiserlicher maiestat gebet von den Beheimen vil Verderbens und unuberwindtlichen schaden erlitten, von den man noch sta^etter und manigfelltiger angriff des stiffts herschafften warttend ist. Und wann die undertan desselben stiffts also mit ta^eglichen krieg so sere mu^eed gemacht und an iren krefften leib und gut erschepfft sind, das sŷ hinfu^er nicht widersteen mu^egen, wie mo^echt dann der erwirdigist herr cardinal die nahenden und an sŷ ru^erenden herrschafft von den Behaimen behallten, der ein ausslender ist und kainer nachbawern oder nahend gewontten beistannd hat, sunder villeicht vil heimlicher veinttschafft haben wurde, wie soll er auch manigerlai fursten graven freÿen und anndern edlen ritterma^essigen widersteen, den villeicht nicht allain die fursehung swa^ere, sunder auch des cardinals person unbekannt und ungevellig ist, so im die widerwa^ertig sein wellen, als sich aus warlicher anzaigung zu fu^ersehen ist, wie werden wir narung haben oder wie sullen wir der kirchen und dem gottsdiennst auswartten oder uns und die underthan des stiffts entthallten, wann das merer tail unnserr narung aus derselben hertzogtumb, herrschefften oder gepietten uns zugefu^ert wirdet und also von denselben zusteet? Zuletzt nachdem der stifft mit grossen schulden beladen und die gu^ellt des stiffts uber dŷ zinns, so man den gelltern zu betzallen schuldig ist, wenig ertragen, wie wil der heiligen Romischen kirchen cardinal seinen stannd hallten, und das swarer ist, derselb erbirdig herre cardinal auch nicht mit klainer schuld peswa^ert, so dieselben dem stifft zugetzogen wurden? Wie mocht er den stifft Passaw darvon enttheben, oder was nutz mocht es bringen und darumb der benannt stifft aus not verderben mu^est, das dann alles in der tat ist und sich darinnen hellt und so es unnserm heiligisten vatter dem babst beka^ennt oder furgelegt wa^er worden, furwar sein heiligkeit hat den cardinal mit dem stifft Passaw nicht furgesehen, sunder desselben nutz annders betracht und ein so edl gelid der mu^eter der heiligen chrisstenlichen kirchen also in letzts verderben nicht gevellet? Darumb wir uns manigfelltig peswa^ert befinden und uns kunfftigklich mer peswa^ert werden pesorgen von den benannten peswa^erungen gegenburtigen und kunfftigen auch von den geistlichen penen und processen, droungen allen anndern und ÿeden daraus vollgenden, auch allen und ieglichen scha^eden annderen zugefu^egten und zugefu^egt werden mu^egen, begerend recht ergeen zu lassen, das niemands, der es begert, ist zu versagen, das wir auch hiemit diemu^eticlich und so vasst wir mu^egen, vleissigklich bitten und gepetten sein, betzewgen zirlichen und als wir von rechts wegen bitten sullen und mugen fur uns und all annder, wie vor steet, uns anhangunden, auch als der, durch der widerpartheÿ unbillich furbringen oder ha^essigen verklagen oder mit ungestu^emiger bet ersu^echung umbgefu^ert oder umbkomen ist, bas und pesser zu underrichten, in diesen geschrifften appellieren beru^effen bitten und reclamieren etc. bitten apostel vleissig vleissiger und allervleissigist, ob ÿemand seÿ, der uns die geben wo^ell oder mu^eg oder sunst von ew offennbaren notarien und getzewgen hie gegenburtig solh, welich die natur diser sach von recht, gewonhait oder annder weis eraischt und ervordert underworffen auch uns unnsern tail und all und ieglich uns anhanngend oder die uns anhanngen wo^ellen, in den schu^etz und schirm des benanntten unsers heiligen vatter und babstlichen stu^els, betzewgen auch, das wir unnser vorgemellten apellation mit beru^effung verkundung volfu^erung und anndern clausein notturftigen und gewo^endlichen zirlickeitten nachgeen wo^ellen mit vorbehalltung des rechtens, die zu meren zu mŷndern zu verkeren zu und von dann seczen und alles annders ze tu^en, das recht gewonhait herchomen und billich ist. Uber das alles und ÿedes etc. Actum Patavie in stuba capitulari.^a||
Conradus Kernn, presbyter Pataviensis.^a||
Erasmus Wu^eerer, presbyter Salczburgensis diocesis, notarii ad premissa.^a

Source Fulltext: FUCHS, Göttweig III (=FRA II/55, Wien 1902) S. 171-178