Nos Rudolfus comes in Werdenberg, frater ordinis militaris Iherusolimitani, bavilinus Brandeburgensis, commendator domus sancti Iohannis in Freÿburg etc., commissarius negocii indulgentiarum apostolicaruin pro defenssione fidei katolice et insule Rhodi per sanctissimum dominum nostrum, dominum Sixtum papam quartum contra perfidos Turcos per universum orbem motu proprio concessarum specialiter subdelegatus dilecto nobis in Christo fratri Wilhelmo professo monasterii beate Marie virginis in Gottwico, ordinis sancti Benedicti Pataviensis diocesis, salutem in domino sempiternam. Provenit etc. Hinc est, quod nos tuis devotis supplicationibus inclinati tibi, ut aliquem ydoneum et discretum presbyterum secularem vel cuiusvis ordinis regularem in tuum possis eligere confessorem, qui confessione tua diligenter audita pro commissis per te quibusdam iniectionis manuum in episcopum vel superiorem ac libertatis ecclesiastice offense seu conspirationis in personam aut statum Romani pontificis vel cuiusvis offense inobediencie aut rebellionis sedis eiusdem ac presbytericidii, casibus dumtaxat exceptis in reservatis semel tamen, in aliis vero non reservatis tociens, quociens durante vita tua fuerit oportunum, debitam absolutionem impendere et penitenciam salutarem iniungere ac omnium peccatorum tuorum, de quibus corde contritus et ore confessus fueris semel in vita et semel in mortis articulo plenariam remissionem et indulgenciam auctoritate apostolica tibi concedere, vota denique omnia ultramarino^a sanctorum Petri et Pauli ac sancti Iacobi in Campostella apostolorum necnon castitatis et religionis votis dumtaxat exceptis in alia pietatis opera commutare possit dicta auctoritate, qua per ipsius sedis litteras sufficientique muniti facultate fungemur in hac parte, indulgemus. In quorum fidem has nostras litteras sigilli nostri appenssione munitas fieri iussimus atque mandavimus. Datum die duodecima mensis maii anno a nativitate domini millesimo quadringentesimo octuagesimo primo. Forma absolucionis in vita super plenariam indulgentiam: misereatur etc., dominus noster Iesus Christus per suam piissimam misericordiam te absolvat et ego auctoritate eiusdem ac beatorum Petri et Pauli apostolorum eius ac sanctissimi domini nostri pape mihi in hac parte commissa et tibi concessa absolvo te a vinculis excommunicationis ac aliis censuris ecclesiasticis, si incidisti, ab omnibus quoque peccatis tuis criminibus excessibus et delictis, quantumcumque gravibus et enormibus etiam sedi apostolice reservatis iuxta apostolici indulti tenorem imparciendo tibi plenariam remissionem omnium peccatorum tuorum et restituo te gremio et unioni sancte matris ecclesie et eiusdem sacramentis in nomine patris et filii et spiritus sancti; amen. Pro symoniacis post punctum: ab omni vinculo excommunicationis, addatur: et a symonie labe ac censuris, quas inde incurristi, et dispenso tecum super irregularitatibus incursis abolendo a te omnem inhabilitatis et infamie maculam inde secutam. In mortis articulo addatur: et absolvo te ab omnibus penis purgatorii ignis, in quantum claves ecclesie se plenarie extendere possunt, in nomine patris et filii et spiritus sancti; amen.

Source Fulltext: FUCHS, Göttweig III (=FRA II/55, Wien 1902) S. 186-188