Georgius miseracione divina tituli Sancte Lucie in silice sacrosancte Romane ecclesie presbyter cardinalis et episcopus Pataviensis universis et singulis abbatibus prioribus prepositis ac priorissis et conventibus monasteriorum sancti Benedicti, Augustini canonicorum regularium, sancti Dominici et beate Marie Magdalene de penitentia ordinum et ecclesiarum parrochialium rectoribus sive locatenentibus, eorundem divinorum cooperatoribus necnon presbyteris curatis et non curatis per diocesim nostram Pataviensem ubilibet constitutis in decanatu Mauttarnn etc. Cum ex vetusta laudabili et a multis retroactis temporibus in episcopatibus et diocesibus parcium Alemanie approbata consuetudine introductum sit et observatum, quod persone ecclesiastice, cuiuscumque dignitatis status ordinis aut condicionis existant, tam exempte quam non exempte suis novis pastoribus et ordinariis ad episcopatus huiusmodi per cessum vel decessum assumptis et legittime confirmatis de aliquo caritativo subsidio seu subvencionis auxilio iuxta prelaturarum, beneficiorum et statuum suorum contribuere teneantur, nos vero, qui ad ecclesiam Pataviensem solacio pastoris carentes per sedem apostolicam rite et legittime licet ad tanti regiminis suscepcionem non nostris meritis., sed divina disponente clemencia confirmati et consecrati¹ nostrorum predecessorum vestigiis ingerentes, quatenus scissuris calamitatibus et erumpnis, quibus dicta ecclesia nostra Pataviensis a pluribus iam preteritis annis tum per hereticos tum etiam per continua bella intestina atque civilia sive cassacione afflicta et oppressa fuit et est, attentis vos omnes et singulos supradictos et unum quemlibet in domino exhortamur ac etiam vobis et cuilibet vestrum in virtute sancte obediencie committimus et mandamus, quatenus nostro nomine honorabili devoto nostro dilecto Waltasari Mauszperger, decano in Mauttarnn, unusquisque vestrum iuxta et secundum qualitatem dignitatum beneficiorum et statuum vestrorum necnon antiquam in hac nostra diocesi Pataviensi observatam consuetudinem terciam partem absentiarum beneficiorum vestrorum dignitatum beneficiorum et statuum suorum, prout et quemadmodum presencium lator nuncius noster in hac parte iuratus vobis et cuilibet vestrum taxam ascriptam clarius enumerabit, infra XXX dierum spacium a die requisicionis et insinuacionis vobis legittime facte computando, quorum XXX decem pro primo, decem pro 2. et reliquos decem pro 3. et peremptorio termino [habeatis] ac monicione canonica. De hiis stabimus relacioni nuncii iurati, eandem 3. absentie partem realiter et cum effectu assignare et contribuere non omittatis taliter agentes, quod periculis et calamitatibus dicte nostre ecclesie a perdicionis alumpnis incumbentibus, quantum nobis ex alto concessum fuerit. subvenire et obviare valeamus vosque graciam et benivolentiam nostras ultra condignum possitis reportare. Verum si in hiis rebelles negligentes et mandatorum nostrorum suprascriptorum contemptores extiteritis. quod minime credimus, extunc prefatus noster decanus in Mautarnn, cui ad hoc exequendum vice et loco nostri plenariam dedimus et concessimus facultatem vos et vestrum quemlibet ad dandum contribuendum et solvendum nobis solitum et consuetum caritativum subsidium huiusmodi viis et remediis iuris cogendi compellendi et cohercendi. prout et quemadmodum in quibusdam aliis nostris litteris sibi desuper confectis per nos atque traditis et assignatis plenius continetur. Datum Wienne die quinta mensis iunii anno domini etc. octuagesimo primo.

Source Fulltext: FUCHS, Göttweig III (=FRA II/55, Wien 1902) S. 188-190