Venerabilis pater! etc. Litteras vestras super querela domini Georgii Huebmer longas quidem et multa continentes hodie percepimus, quibus responssuri arbitramur vestram dominacionem iam pridem ad plenum edoctam esse in controversia pro Pataviensi ecclesia apostolice sedis ac imperialibus nos tamquam christiane professionis hominem paruisse mandatis, ob quam quidem causam nemo a Pataviensi ecclesia. que est filia et membrum sacrosancte Romane ecclesie, recadere seu ei iniurias inferre videtur. Anno etiam preterito ecclesie parrochiali in Mautarn nostro monasterio pleno iure incorporate sub ratihabicione etiam domini decani competentibus providimus vino necessario et presertim vino, de quo iam precipua fit questio. Dominus tamen Georius prefatus in dies postulare non cessat cui sepenumero in hanc sentenciam responderi fecimus nos pro necessitate nostre ecclesie in Mautarn, si cetera essent paria, nedum unum vas sed eciam vel duo modici pendere, minime hesitantes vestram p. bono ac incremento nostri monasterii plurimum favere pro vestraque animi industria et circumspeccione intelligere contribucionem aliquam, sicut dominus Georius postulat. magne indignacioni contra nos aput cesaream maiestatem locum prebere ac exinde nobis non modo in rebus extremis, verum etiam in consciencia periculum ermergere. Hec vos tamquam iurisconsultus pro racione interdicti in eundem locum per r. d. cardinalem lati melius et liquidius interpretari poteritis. Mirum denique in modum cupimus scire causam huius vestre suspicionis. qua pretenditis monachos nostros destruccionem pocius quam edificacionem monasterii querere neque eorum ignorare regimen, cum sint ab hoc mundo sequestrati, in cellis lateant ac divino tantummodo servicio vacent. errata eorum iuxta nostre sancte regule tradiciones capitulari diluuntur rigore nec se quisquam eorum extra et ultra nostrum mandatum secularibus mancipat negociis, unde ergo eorum, de quo vos scribitis, progreditur regimen. Parcite itaque piis mentibus, parcite nostro monasterio inter medias adversaminum fauces ut videtis concluso ac ex omni parte afflicto benignioremque opinionem de nobis ac nostris, quam soletis, induite neque flagellum flagello inducite. Apostolice sedi veluti adopcionis filii parere tenemur, imperialia mandata preterire sine nostro et nostri monasterii precipicio non possumus. Hec singula vos in meliorem suscipere velitis partem condigno tempore omnium rerum moderatore erga vos recompensandum!^a Datum in Gottwico feria 4. post nativitatem beate virginis 81.||
L(aurencius) dei gracia abbas G(ottwicensis).

Source Fulltext: FUCHS, Göttweig III (=FRA II/55, Wien 1902) S. 196-198