Wir Friderich etc. bekennen, daz wir angesehen haben den gotsdinst, so der ersam geistlichen unser lieben andêchtigen Mathes abbt zum Go^ettweig unser rate und der convennt daselbs volbringen, und haben dadurch und von sonndern gnaden, damit sy denselben gotsdinst dest emssigklicher volbringen mu^egen, des wir auch hoffen tailhêfftig ze werden, sy und desselben irs gotshaws lêwt und gu^et, so yeczu zeiten u^eber unser prugken zu Stain raisen und bracht werden, des prugkgellts, so sy davon daselbs zu Stain zu raichen schuldig sein wurden, begeben und nachgelassen begeben und [la]ssen^a auch nach wissenntlich mit dem brief also, daz dieselben closterlêwt ir diener lewt und holden und ir gut, als offt des nottu^et, u^eber die beru^ert pru^egken frey hanndeln farn und bringen mugen und umb das prugkgellt davon von unsern mawttern und ambtlêwten daselbs unangelanngt und unbekumbert beleiben su^ellen ungevêrlich. Davon gebieten wir den edeln unsern lieben getrewn . . allen unsern haubtlêwten lanndmarschalhen graven freyn herren rittern und knechten verwesern phlegern burggraven lanndrichtern burgermaistern richtern rêten burgern gemainden und allen anndern unsern ambtlêwten undertannen und getrewn besonnder unsern getrewn, lieben Hannsen Harrasser, Ruprechten Ennser unserm kuchenmaister, unsern reten, Mertten Burger, unsern hubmaistern [in]^a O^esterreich, und Bernharten Karlinger unserm diener oder wer kunfftiklich unser prugkgellt daselbs innemen wirdet, ernstlich und wellen, daz sy die obbemelten closterlêwt ir diener und holden bey disen unsern gnaden und freyhait, wie vor steet, gênnczlich und berublich beleiben lassen und sy dawider nicht dringen und beswern noch des yemannds annderm ze tun gestatten in dhain weis, doch daz dieselben closterlêwt zu ergetzung solher unser gnaden, alsofft die bemelt prugken zebrochen wirdet, ir holden und lêwt darleihen, die dieselb prugken helffen ze machen ungevêrlich. Mit urkund des briefs geben zu Lŷnncz an freitag vor dem suntag oculi in der vassten nach Cristi geburde vierczehenhundert und im drewundnewnczigisten, unsers kaisertumbs im ainsundvierczigisten, unser reiche des Ro^emischen im drewundfu^enffczigisten und des Hungrischen im fu^enffunddreissigisten jaren.

Source Fulltext: FUCHS, Göttweig III (=FRA II/55, Wien 1902) S. 268